დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ინფექციური საავადმყოფოს სამედიცინო დირექტორის ინფორმაციით, კორონავირუსის დღეს დადასტურებული 19 ახალი შემთხვევიდან 8 ლილოს ბაზრობიდანაა, 5 — გაჩიანიდან, 2 კი იმპორტირებულია და მათ შორის ერთი სატვირთო ავტომობილის მძღოლია. კიდევ ერთი სამედიცინო პერსონალია, ხოლო სამი შემთხვევის წყარო უცნობია და გრძელდება ეპიდემიოლოგიური კვლევა.

როგორც ეზუგბაია აღნიშნავს, ამ დროისთვის კოვიდ ცენტრებში სულ 214 ინფიცირებული მკურნალობს.

ჟურნალისტების კითხვას, ჰქონდათ თუ არა კონტაქტი ლილოს ბაზრობაზე დასაქმებულ ადამიანებს მომხმარებლებთან, ინფექციური საავადმყოფოს სამედიცინო დირექტორი ასე პასუხობს:

"პირებს, რომლებიც მუშაობდნენ ლილოს ბაზრობაზე, ალბათ გარკვეულ ნაწილს ჰქონდა მოსახლეობასთან კონტაქტი. ჩვენ ვამბობთ, რომ ლილოს ბაზრობაზე არის შემთხვევები და ეს უნდა გაითვალისწინოს მოსახლეობამ. კოვიდი არ წასულა ქვეყნიდან, რჩება ქვეყანაში. არ აქვს მნიშვნელობა, 19 იქნება ახალი დადასტურებული თუ ერთი. მნიშვნელოვანია, რომ რეგულაციები შესრულდეს", — თქვა ეზუგბაიამ.

მან კიდევ ერთხელ აღნიშნა, რომ აუცილებელია დისტანციის დაცვა და პირბადეების გამოყენება.

ბოლო მონაცემებით, ქვეყანაში კორონავირუსის სულ 1104 შემთხვევაა გამოვლენილი, აქედან 912 ადამიანი უკვე გამოჯანმრთელდა, ხოლო 16 გარდაიცვალა. კარანტინის რეჟიმში რჩება 5 936 პირი, სტაციონარში მეთვალყურეობის ქვეშ — 268. უცხოეთიდან საქართველოში სამკურნალოდ 41 ადამიანი გადმოიყვანეს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: