საერთაშორისო გამჭვირვალობა - საქართველოსთვის (TI) გაუგებარია ზუგდიდის საკრებულოს გადაწყვეტილება საფეხბურთო კლუბ ზუგდიდის 900 ათასი ლარით დაფინანსების შესახებ. TI თავისი პრეტენზიის მიზეზად კლუბის უცხოურ ინვესტორზე გასხვისებას ასახელებს, რომელსაც 2017 წლისთვის 300 ათასი აშშ დოლარის ინვესტიციის განხორციელების ვალდებულება დაეკისრა. აღნიშნულის შესახებ საერთაშორისო გამჭვირვალობა – საქართველომ 7 დეკემბერს, ქალაქ ზუგდიდის მუნიციპალიტეტის 2017 წლის ბიუჯეტის პროექტთან დაკავშირებით გამოქვეყნებულ რეკომენდაციებში აღნიშნა.

არასამთავრობო ორგანიზაცია მიიჩნევს, რომ საფეხბურთო კლუბისთვის დაფინანსების გამოყოფაზე მსჯელობის დაწყებამდე, მერიამ სრულყოფილად უნდა წარმოადგინოს ინფორმაცია საფეხბურთო კლუბის გარშემო არსებული პრობლემების შესახებ და მკაფიოდ ჩამოყალიბდეს კლუბის მიმართ მუნიციპალიტეტისა და ინვესტორის ვალდებულებები.

2016 წლის 29 ოქტომბერს, „ლაივპრესთან“, საუბრისას საფეხბურთო კლუბ „ზუგდიდის“ კაპიტანი ნიკოლოზ აფქაიძე აღნიშნავდა, რომ ინვესტორები უარს აცხადებდნენ თანხის დარიცხვასა და გუნდის დაფინანსებაზე.

„აღსანიშნავია, ის ფაქტი, რომ წლების განმავლობაში ქალაქ ზუგდიდის მერიის მხრიდან კლუბში მზარდი ინვესტიციების ჩადებამ შედეგი არ გამოიღო და მიმდინარე წლის მდგომარეობით, ზუგდიდის ზუგდიდი უკვე დაქვეითდა ქვედა ლიგაში, კლუბს ასევე აქვს ფინანსური დავალიანებები“, - აღნიშნულია რეკომენდაციებში.

ქალაქ ზუგდიდის მერიამ 2016 წლის 19 აგვისტოს საფეხბურთო კლუბ ზუგდიდის 51 პროცენტიანი წილის „უკრაინელ სპონსორებზე“ გასხვისების შესახებ გაავრცელეს ინფორმაცია. აღნიშნული შეთანხმებით, სპონსორები საფეხბურთო კლუბ ზუგდიდის დაფინანსების, ბავშვთა ფეხბურთის განვითარებისა და ინფრასტრუქტურის მოწესრიგების ვალდებულებას იღებდნენ.

TI-ს ინფორმაციით, ხელშეკრულების გაფორმებიდან 2016 წლის ბოლომდე, ინვესტორს კლუბში 100 ათასი აშშ დოლარის ინვესტიციის განხორციელების ვალდებულება აქვს. ამავე დოკუმენტის მიხედვით, 2017-2020 წლებში კი, ვალდებულების მიხედვით, განხორციელებული ინვესტიციის ოდენობა 300 ათასი დოლარი უნდა იყოს.