ეკონომიკის მინისტრის, ნათია თურნავას განცხადებით, მთავრობას არასდროს უთქვამს, რომ პირველი ივლისიდან რეგულარული, ანუ მასობრივი ფრენები აღდგებოდა. ამის შესახებ მან პოს ტვ-ის ეთერში ისაუბრა.

"არადსროს ჩვენ არ გვითქვამს, რომ რეგულარული, ანუ მასობრივი ფრენები პირველი ივლისიდან გაიხსნებოდა. ჩვენ ყოველთვის ვამბობდით რას, რომ აუცილებლად გავხსნით ბაზარს, მაგრამ ძალიან მკაცრი კონტროლის ქვეშ", — აღნიშნა თურნავამ.

მისივე თქმით, ზოგადად, ფრენები შეჩერებული არაა და კვლავ მოქმედებს ჩარტერული რეისები. როგორ მინისტრი ამბობს, ადამიანისთვის სულ ერთია ჩარტერით იფრინებს, თუ რეგულარულით, რადგან "ორივე კომერციულია".

რაც შეეხება ფრენების გაუქმებასა და საზღვრების გახსნის საკითხს ნათია თურნავა განმარტავს:

"ყველასთვის გახსნა ნიშნავს რას, რომ დაიწყება მყისიერად ბილეთების გაყიდვა. არანაირი იურიდიული საფუძველი ამის შეზღუდვის არ იარსებებდა. ამასთან ევროკავშირმა მხოლოდ ახლა მიიღო სია, ორში გამოქვეყნდა და არა პირველში, ახლა სათითაოდ სახელმწიფოები აგარჩევენ ან არა. აღმოჩნდებოდა, რომ ხალხი დარჩებოდა მოტყუებული, მათ ეჭირებოდათ ბილეთები ისეთ ქვეყნებზე, რომელიც არ მიიღებდა მათ. ანუ მოლოდინი არ გამართლდებოდა და ამაზე კვლავ ჩვენ ვიქნებოდით პასუხისმგებელნი.

ამიტომ ჩვენ არასდროს გვითქვამს, რომ პირველი ივლისიდან ასე უკონტროლოდ, ქაოტურად მასობრივად გავხსნიდით. სამწუხაროდ, ამის საშუალებას არ გვაძლევს გლობალური ვითარება, ამერიკის შეერთებულ შტატებში ახლა, მაგალითად, პიკია. გახსნა ნიშნავს ტრანზიტული მგზავრისთვის გახსნას, ყველანაირი გახსნა, ამიტომ აბსოლუტურად სწორი იყო, რომ ჩვენ მოვიგეთ დრო".

ჯერ კიდევ მაისის თვეში მთავრობაში აცხადებდნენ, რომ პირველი ივლისიდან საქართველო საერთაშორისო ტურისტების მიღებას დაიწყებდა. მთავრობის წარმომადგენლები ამისთვის ხვდებოდნენ ტურიზმის სფეროს წარმომადგენლებს, მოლაპარაკებებს აწარმოებდნენ და იმ ქვეყნებსაც ასახელებდნენ, საიდანაც ჩამოფრინდებოდნენ პირველი მგზავრები.

თუმცა ცნობილი გახდა, რომ საქართველო საზღვრებს არ გახსნიდა. აღნიშული გადაწყვეტილების გარშემო არაერთი კითხვა გაჩნდა და მინისტრთა კაბინეტი განმარტავდა, რომ ნაბიჯი უსაფრთხოების ზომით იყო ნაკარნახევი.

პირველ ივლისს ევროკავშირმა საქართველო უსაფრთხო ქვეყნების სიაში შეიყვანა და საზღვრები გაუხსნა. ამას ემატება ისიც, რომ დაბალბიუჯეტიანმა უნგრულმა კომპანია Wizz Air-მა ქუთაისში ბაზის დროებით დახურვა გადაწყვიტა.

ამავე დროს, აირზენამ ჩარტერული რეისები დანიშნა, რომლებზეც ბილეთის ფასი მაღალი იყო და ეს მთავრობის წევრებმაც აღიარეს.

დღეს, 2 ივლისს ცნობილი გახდა, რომ მთავრობა მოქალაქეების სამშობლოში დასაბრუნებლად რეისებს აღადგენს. გიორგი გახარიას თქმით, ბილეთის ფასი 200 ევროზე მეტი არ იქნება. მანვე აღნიშნა, რომ სპეცრესიები ერთმა ქვეყანამ აღარ უნდა შეასრულოს.