საგარეო საქმეთა მინისტრი, დავით ზალკალიანი ამბობს, რომ ევროკავშირის მიერ არაწევრი ქვეყნებისთვის საზღვრის გახსნაზე საბოლოო გადაწყვეტილება არ არსებობს. მანვე აღნიშნა, რომ დიდი ალბათობით, საქართველო არის და იქნება იმ უსაფრთხო 15 ქვეყანას შორის, რომელსაც ევროკავშირი გაუხსნის საზღვარს.

"ეს არის მნიშვნელოვანი მიღწევა და აღიარება, რაც საქართველოს მთავრობას ჰქონდა და აქვს პანდემიასთან ბრძოლის თვალსაზრისით", — ამბობს ზალკალიანი.

მინისტრის თქმითვე, რეგულაციები, თუ რა პროცედურები იქნება საქართველოს მოქალაქეების საზღვრის კვეთაზე, ეს იქნება მიღებული ევროკავშირის გადაწყვეტილებით. ზალკალიანის განმარტებით, ისინი ელოდებიან ევროკავშირის ოფიციალურ გადაწყვეტილებას, რომელიც მისივე თქმით, დღეს ან ხვალ გასაჯაროვდება:

"ეს გადაწყვეტილება არ იქნება უბრალოდ საზღვრების გახსნა, ამას მოყვება შესაბამისი რეგულაციები, რა რეგულაციებს უწესებს ევროკავშირი საქართველოს მოქალაქეებს. ჩვენ ველით ოფიციალურ დოკუმენტს სადაც ეს ყველაფერი იქნება გაწერილი".