იუსტიციის მინისტრის, თეა წულუკიანის აზრით, გიგა ბოკერია და შალვა ნათელაშვილი გერმანიის ელჩზე გაკეთებული განცხადებებით სახელმწიფოს აყენებენ შეურაცხყოფას. ამ თემაზე მან იმედი ეთერში ისაუბრა.

"ამ ქვეყანაში რეალურად არასდროს ყოფილა, ან თუ ყოფილა ძალიან იშვიათად, რომ ქართველ ადამიანს, რაც არ უნდა მომხდარიყო, თავისივე ქვეყანაში ამ სიტყვებით გაელანძღა უცხოელი. ეს უკვე ქვეყნისთვის საზიანოა. [...] სახელმწიფოს აყენებენ შეურაცხყოფას უკვე, ბოკერია, ნათელაშვილი და ეს ლიდერები ნაციონალური მოძრაობის და ევროპული საქართველოსი რომელსაც ნათელაშვილის ეზოში აქვთ შტაბბინა", — თქვა თეა წულუკიანმა.

მინისტრის აზრით, ეს განცხადებები ქვეყნისთვის სამარცხვინოა. მისი თქმით, ნაციონალური მოძრაობა, რომელიც წლების განმავლობაში "თავს ყიდის", როგორც დასავლურ პოლიტიკურ ძალად, ნელ-ნელა ნიღაბს იხსნის.

გერმანიის ელჩი, ჰუბერტ ქნირში ამბობს, რომ 8 მარტის შეთანხმებაში გიორგი რურუა ნახსენები არ ყოფილა. ეს განაცხადი მან 26 ივნისს ინტერპრესნიუსის ჟურნალისტის კითხვის პასუხად გააკეთა.

"ბატონი რურუა არ არის ნახსენები ამ შეთანხმებაში. ეს ძალიან მკაფიოა, ყველას შეუძლია ამის წაკითხვა. გაკვირვებული ვარ, იმ დისკუსიის გამო, რაც პოლიტიკურ პარტიებს შორის გაიმართა, ერთმანეთის დადანაშაულების მცდელობა, როცა ოპოზიცია მმართველ პარტიას ადანაშაულებს კანონპროექტის ჩავარდნაში და პირიქით", — თქვა მან.

ევროპული საქართველოს დეპუტატის, გიგა ბოკერიას განცხადებით, გერმანიის ელჩს, ჰურბერტ ქრინშს თანაუგრძნობს, რადგან ის ისევ "შარში გაეხვა". ამავე თემაზე ლეიბორისტული პარტიის ლიდერმა, შალვა ნათელაშვილმა თქვა, რომ ელჩი "ივანიშვილის ლობისტია", მისგან ფინანსდება და გერმანიისგან მისი გაწვევა მოითხოვა.