კრიშტიანუ რონალდუსა და ხოსე მაურინიოს მილიონობით დოლარის შემოსავლებზე გადასახადების თავიდან არიდებაში სდებენ ბრალს. ინფორმაციას ამის შესახებ BBC ავრცელებს.

როგორც ამბობენ, ბრალდებები ეყრდნობა 2 ტერაბაიტის მოცულობის გაჟონილ ინფორმაციას, რომელიც ორიგინალ კონტრაქტებს შეიცავს.

რონალდუ და მაურინიო ბრალდებებს უარყოფენ.

სპორტსმენების წარმომადგენელმა სააგენტომ Gestifute განაცხადა, რომ რონალდუ და მაურინიო სრულად ასრულებენ საკუთარ ვალდებულებებს:

"თითოეული ბრალდება გადაეცემა სამართალდამცველებს და შესაბამისად იქნება გამოძიებული."

ბრალდებების თანახმად, რონალდუმ, 2014 წლის ბოლოს, ვირჯინიის კუნძულებზე 63.5 მილიონი ევრო გადაიტანა. რაც შეეხება მაურინიოს, მან, სავარაუდოდ, 12 მილიონი ევრო გადაიტანა ბრიტანეთის ვირჯინიის კუნძულების კომპანიის კუთვნილ შვეიცარიულ ანგარიშზე.

ბრალდებები გამომძიებელ ჟურნალისტთა საერთაშორისო კონსორციუმმა (ICIJ) გამოაქვეყნა, რომელმაც ხელში 18 მილიონი დოკუმენტი ჩაიგდო. დოკუმენტებში სხვა ცნობილი მოთამაშეებიც ფიგურირებენ.

ასეთი რაოდენობის დოკუმენტები ჟურნალისტებისთვის უკვე მეორედ, ე.წ. პანამის დოკუმენტების გაჟონვიდან 8 თვის შემდეგ გახდა ხელმისაწვდომი.