გერმანულმა სპეცსამსახურებმა დააკავეს გერმანიის 51 წლის მოქალაქე, რომელიც სოციალური ქსელების საშუალებით გამოხატავდა მხარდაჭერას ტერორისტი ისლამისტების მიმართ და ავრცელებდა მუქარას. როგორც CNN იტყობინება, ის ინტერნეტში ანონიმური სახელით მოქმედებდა. მედიასაშუალება გამოძიებასთან დაახლოებულ წყაროზე დაყრდნობით აცხადებს, რომ ბრალდებული წარსულში გეი პორნო ფილმებში მონაწილეობდა. მან 2016 წლის აპრილში მუშაობა დაიწყო გერმანიის კონსტიტუციის დაცვის ფედერალურ ოფისში, რაც ქვეყნის უსაფრთხოების სამსახურის უმნიშვნელოვანეს ელემენტს წარმოადგენს.

გამოძიების ინფორმაციით, ბრალდებული დახურულ ჩატებში ინფორმაციას ავრცელებდა დაგეგმილი სპეცოპერაციების ჩატარების დროისა და ლოკაციების შესახებ. გარდა ამისა, ის ჩატში მოსაუბრეს სთავაზობდა ჩაედინათ მაშტაბური ძალადობრივი აქტი იმ პირთა მიმართ, "ვისაც არ სწამს ალაჰი".

ამჟამად პარალელურად მიმდინარეობს გამოძიება, ბრალდებულმა როგორ მოახერხა ისეთ სამსახურში მუშაობის დაწყება, როგორიცაა გერმანიის კონსტიტუციის დაცვის ფედერალური ოფისი. ასევე უცნობია, ყოფილ პორნო ვარსკვლავს რატომ გაუჩნდა რადიკალური ისლამისტური შეხედულებები. ცნობილი ფაქტია, რომ ტერორისტული დაჯგუფება ისლამური სახელმწიფო სასტიკი მეთოდებით უსწორდება ჰომოსექსუალებს. არაერთი შემთხვევაა აღრიცხული, როცა ტერორისტებმა ჰომოსექსუალი პირები მაღალსართულიანი შენობებიდან გადმოაგდეს, ან ჩაქოლეს.