მთავარი არხის მეწილე გიორგი რურუა გიორგი რურუა კვლავ პატიმრობაში დატოვეს. დღეს, 11 ივნისს სასამართლოში პროკურატურის მოწმეების დაკითხვა დასრულდა.

აღკვეთის ღონისძიების სახის შეცვლის შუამდგომლობა დაცვის მხარემ დააყენა. როგორც საქმის პროკურორმა ვასილ სამხარაძემ განაცხადა, არსებობდა რურუას მიმალვისა და დანაშაულის ჩადენის საფრთხეები არსებობდა, ის გამოც შუამდგომლობას არ დაეთანხმნენ.

გიორგი რურუას ადვოკატის, დიმიტრი საძაგლიშვილის განცხადებით, პროცესი "შაბლონურია" და სასამართლო განხილვაც "ფორმალურია".

"როცა საფუძველი გვექნება, მიუხედავად იმისა, რომ ჩვენ ღრმად ვართ დარწმუნებული, რომ მოსამართლე სამართლიან გადაწყვეტილებას არ მიიღებს, ცხადია ყველა შესაძლებლობას გამოვიყენებთ და ყოველთვის მოვითხოვთ, თუნდაც [შუამდგომლობას] იმის საჩვენებლად, როგორი მიკერძოებულია სასამართლო და რამდენად ერთ მხარეს წარმოადგენს", — განაცხადა საძაგლიშვილმა.

გიორგი რურუა ერთ-ერთია იმ პატიმრებს შორის, რომლის გათავისუფლებასაც ოპოზიცია 8 მარტის შეთანხმების ფარგლებში მოითხოვდა. ნაციონალური მოძრაობა და ევროპული საქართველო აცხადებენ, რომ ის პოლიტიკური ნიშნითაა დაკავებული და მისი გათავისუფლების გარეშე საკონსტიტუციო ცვლილებებს მხარს არ დაუჭერენ.

გიორგი რურუას გათავისუფლების მოწოდებებს მმართველ პარტიას უგზავნიან ევროპარლამენტიდანაც. ისინი აცხადებენ, რომ 8 მარტის შეთანხმება მთლიანად უნდა შესრულდეს.

გიორგი რურუა 2019 წლის 18 ნოემბერს იარაღის უკანონო ტარების ბრალდებით დააკავეს. მისი უფლებადამცველი და პარტნიორი ნიკა გვარამია აცხადებს, რომ გიორგი რურუას იარაღი ჩაუდეს. დაკავებული ბრალს არ აღიარებს და ამბობს, რომ იარაღი მას საერთოდ არ უნახავს.

მოგვიანებით პროკურატურამ გიორგი რურუას ბრალი დაუმძიმა. პროკურატურის განცხადებით, ბრალს დაემატება ახალი მუხლი სასამართლო გადაწყვეტილების შეუსრულებლობისა და მისი შესრულებისათვის ხელის შეშლის შესახებ. ბრალდების მხარე აცხადებს, რომ გიორგი რურუამ უარი განაცხადა სასამართლოს განჩინების მიხედვით დნმ-სა და ხელის კვლევების ნიმუშის აღების თაობაზე. მიმდინარე წლის 15 იანვარს კი გამომძიებელმა განაცხადა, რომ რურუასგან დნმ-ის ნიმუში ნებაყოფლობით აიღეს.

რურუა ბრალს არ აღიარებს.