იუსტიციის მინისტრმა, თეა წულუკიანმა მოუწოდა მოსახლეობას, სიფრთხილე შეინარჩუნონ, რადგან ქვეყანაში დაფიქსირებულია ინფიცირების შემთხვევები, რომელთა პირველწყარო უცნობია. მისი თქმით, ამის გამო რეგულაციების ხელახლა გამკაცრების და ჩაკეტვის საფრთხე არ დგას, თუმცა საჭიროა მეტი გონიერება.

"ის, რომ 6 ახალი შემთხვევაა, როგორც რიცხვი ეს კი არ არის საგანგაშო, არამედ საგანგაშო არის ის, რომ არაერთი მათგანის შემთხვევაში ვერ მივაგენით რიცხვს, საიდანაც ეს ადამიანები არიან დაავადებულები.

დაკეტვის ანუ გამკაცრების ღონისძიებებზე საუბარი არ არის. ჩვენ, უბრალოდ, ვეუბნებით საზოგადოებას, რომ მაქსიმალური სიფრთხილე და გონიერება გამოიჩინეთ, რომ არ დაავადდეთ ამ ვირუსით", — განაცხადა მან.

ბოლო 24 საათში კორონავირუსის 6 ახალი შემთხვევა გამოვლინდა, ხოლო 4 ადამიანი გამოჯანმრთელდა. მათგან 1 საკარანტინო სივრციდანაა, ხოლო 1 სამედიცინო პერსონალია. 4-ის წყარო უცნობია.

სულ შემთხვევები 828-მდე გაიზარდა, გამოჯანმრთელებულების რიცხვი 694 გახდა. გარდაცვლილია 13 ადამიანი. კარანტინის რეჟიმში 3 230 ადამიანი რჩება, ხოლო სტაციონარში მეთვალყურეობის ქვეშ — 285.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: