მოხეს მეჩეთის ირგვლივ შექმნილ ვითარებასთან დაკავშირებით გირჩი განცხადებას ავრცელებს.

პოლიტიკური ცენტრი აქცენტს აკეთებს იმ მდგომარეობაზე, რომელშიც უმცირესობები არიან და აცხადებს, რომ რელიგიური თუ სხვა ნიშნით შევიწროება, დევნა, ფიზიკური და სიტყვეირი ძალადობა უმცირესობების მიმართ ერთ-ერთი ყველაზე მწვავე პრობლემაა.

გირჩი ხელისუფლებას პრობლემისადმი არაეფექტიან და არაადეკვატურ რეაგირებაში ადანაშაულებს:

"ცხადია, რომ ე.წ. მოხეს გარემოების შემსწავლელი კომისიის შექმნა ემსახურებოდა დროის კიდევ ერთხელ გაჭიანურებისა და არა პრობლემის სამართლიანად გადაწყვეტის მიზანს.

რაც ხდება მოხეს მეჩეთის შემთხვევაში, მხოლოდ ახალისებს შემდგომ შეუწყნარებლობას, არღვევს ადამიანის ფუნდამენტურ უფლებებს და წარმოადგენს საფრთხეს ეროვნული უსაფრთხოებისთვის".

გირჩი მოუწოდებს ხელისუფლების შესაბამის სტრუქტურებს, შეწყვიტონ კომისიების, საბჭოებისა და სამუშაო ჯგუფების შექმნით "დროის გაყვანა" და დააჩქარონ პროცედურები, რომლებიც მოხეს მეჩეთის სახელმწიფო საკუთრებიდან სამუფთოს საკუთრებაში დროულ გადასვლას უზრუნველყოფენ.

მუსლიმი თემი მიიჩნევს, რომ ნაგებობა, რომელიც ადიგენის მუნიციპალიტეტის ბალანსზე ირიცხება, არის მეჩეთი, თუმცა, მისი კუთვნილების შესახებ გადაწყვეტილება დღემდე არ არის მიღებული კომისიის მიერ, რომელიც სადავო შენობის საკითხს 2 წელია სწავლობს.

შენობის კუთვნილების გაურკვევლობის გამო მოხეში ადგილობრივ მოსახლეობას შორის დაპირისპირება 2014 წელს მოხდა.