ჯორჯ ფლოიდის გარდაცვალების გამო აშშ-ში ბოლო დღეების განმავლობაში საპროტესტო გამოსვლები იმართება, სადაც სისტემური რასიზმის პრობლემებს უპირისპირდებიან და პოლიციის რეფორმას ითხოვენ.

აქციებს მსოფლიოს სხვადასხვა ქვეყნის მოქალაქეებთან ერთად ცნობილი სახეებიც შეუერთდნენ და მათ შორის იყო მსახიობი მაიკლ ბი ჯორდანიც, რომელმაც ლოს-ანჯელესში სიტყვით გამოსვლისას ჰოლივუდის ინდუსტრიას დასაქმების პრაქტიკის გადახედვისკენ მოუწოდა, რათა მეტ შავკანიან ხელოვანს მიეცეს თავისი შემოქმედების წარმოჩენის უფლება.

"მე ვიყენებ ჩემს ძალაუფლებას, რომ სადაც შემიძლია, ყველგან მოვითხოვო მსგავსი რასობრივი მრავალფეროვნება, მაგრამ ახლა კინოსტუდიების, სააგენტოებისა და იმ ყველა კორპორაციის ჯერია, ვისი შენობების წინაც ვდგავართ ახლა. ვისურვებდი, რომ მათაც იგივე გაეკეთებინათ", — ამბობს მსახიობი.

Black Panther-ის ვარსკვლავის აზრით, ამ პრობლემას გენდერული უთანასწორობის აღმოფხვრის მსგავსად უნდა შეხედონ:

"2020 წელს თანაბარ გენდერულ მონაწილეობაზე 50/50 პასუხისმგებლობა აიღეთ. რაღას იტყვით შავკანიანების დასაქმებაზე? შავკანიანების შემოქმედება, რომელსაც შავკანიანი პროდიუსერები და კონსულტანტები შექმნიან. სათანადოდ ცდილობთ, რომ კინოში ჩვენი ისტორიების რეპრეზენტაცია მოხდეს? საშუალება მოგვეცით, ჩვენი შესაძლებლობები სათანადოდ გამოვავლინოთ".

მაიკლ ბი ჯორდანი ასევე აღნიშნავს, რომ თანამედროვე სამყაროში ისეც უყვართ შავკანიანებისთვის დამახასიათებელი კულტურული ნიშნები, შესაბამისად, მათ მეტად სჭირდებათ მხარდაჭერა, რომ უფრო მეტი სიახლე შესთავაზონ ყველას:

"შავკანიანების კულტურა, იქნება ეს კედები, სპორტი თუ კომედია, თქვენ ყველას ძალიან გიყვართ, მაგრამ ჩვენ მუდმივად დისკრიმინაციასთან ბრძოლა გვიწევს. შეგიძლიათ დაეხმაროთ შავკანიანთა ბრენდებს, კომპანიებსა და ორგანიზაციებს დაფინანსებით?"