სახალხო დამცველი, ნინო ლომჯარია აცხადებს, რომ მის წინააღმდეგ ორგანიზებული დეზინფორმაციის კამპანია მუდმივად მიმდინარეობს. ამის შესახებ მან ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე განაცხადა.

ლომჯარიამ დეზინფორმაციის ერთ-ერთ მაგალითად სახალხო დამცველის განცხადებების სისტემურად დამახინჯება მოიყვანა.

"ვფიქრობ, ალბათ ყველა საჯარო პირი მეტ-ნაკლებად დეზინფორმაციის, ფეიკ ნიუსები თუ მაკომპრომეტირებელი კამპანიის მსხვერპლი გამხდარა. შემიძლია გითხრათ, რომ სახალხო დამცველის წინააღმდეგ მუდმივად მიმდინარეობს ორგანიზებული დეზინფორმაციის კამპანია, როდესაც მაგალითად სისტემატურად მახინჯდება სახალხო დამცველის განცხადებები. ტყუილით, არასწორი ფორმით სისტემურად გავრცელება, რა თქმა უნდა, უარყოფითად აისახება ჩვენს საქმიანობაზე და იმიჯზეც, რადგან საზოგადოება შეცდომაში შედის და ზოგადად, ინსტიტუტის მიმართ ნდობა ეკარგება, რომელმაც მათი უფლებები უნდა დაიცვას", — განაცხადა ლომჯარიამ.

ომბუდსმენმა მედიასაშუალებებს მოუწოდა, რომ დაიცვან ეთიკის ნორმები და სტანდარტები და გადაუმოწმებელი ინფორმაციის გავრცელებისგან თუ ცრუ ბრალდებებისგან მაქსიმალურად თავი შეიკავონ.