ვაქცინა, რომელსაც მეცნიერები "HIV-ის კუბოში ბოლო ლურსმანს უწოდებენ" სამხრეთ აფრიკაში საბოლოო ტესტირებას გაივლის.

მკვლევართა ჯგუფს იმედი აქვს, რომ HTVN 702 საბოლოოდ მიგვიყვანს HIV/შიდსის საბოლოოდ განკურნებამდე. ამ საშინელი დაავადებით მსოფლიოში 37 მილიონი ადამიანი იტანჯება და წელიწადში 1 მილიონი იღუპება.

ტესტირებაში 5 400 სექსუალურად აქტიური, 18-დან 35 წლამდე სამხრეთაფრიკელი ქალი და მამაკაცი ჩაებმება. ვაქცინა Sanofi Pasteur-მა და GSK-მ შექმნეს.

ტესტირების ამ ეტაპს აშშ-ს მთავრობა, აშშ-ს არმია, სამხრეთ აფრიკის სამედიცინო კვლევითი საბჭო და ბილ და მილენდა გეითსების ფონდი აფინანსებენ.

გამოცდის მიზანია, დაადგინოს ვაქცინის ეფექტურობა და გვერდითი მოვლენები. HTVN 702 სხვა მედიკამენტის მოდიფიცირებული ვარიანტია. 2009 წელს RV144 ტაილანდში 16 400 ადამიანზე შემოწმდა. მაშინდელმა გამოცდამ 31%-იანი წარმატება აჩვენა. ეფექტურობა დაბალი იყო, მაგრამ იმისთვის საკმარისი აღმოჩნდა, რომ მეცნიერებისთვის სწორი გზა ეჩვენებინა.

ამჯერად მკვლევარებს იმედი აქვთ, რომ HTVN 702 მინიმუმ 50%-იან ეფექტურობას აჩვენებს.

ტესტირებაში ჩართული ადამიანების ნახევარს ვაქცინაცია ნამდვილი მედიკამენტით ჩაუტარდება, ხოლო მეორე ნახევარს პლაცებოს მისცემენ. ერთი წლის განმავლობაში ყველა მონაწილეს ხუთი ინექცია გაუკეთდება, მათ ასევე მისცემენ იმუნიტეტის გასაუმჯობესებელ წამალს.

კვლევის საბოლოო შედეგები 2020 წლისთვის იქნება ხელმისაწვდომი.