კრიმინალური ავტორიტეტის, მინდია ლავასოღლის ექსტრადირების მოთხოვნით ბათუმში, იუსტიციის სახლთან აქცია იმართება. ტელეკომპანია ფორმულასთან საუბრისას აქციის მონაწილეებმა განაცხადეს, რომ თუ მოთხოვნები არ შესრულდება სარფის გამშვებ პუნქტს გადაკეტავენ.

"მეოთხე დღეა ხალხი შიმშილობს, გუშინ 4-მა ადამიანმა ამოიკერა პირი, იმიტომ, რომ გამოხმაურება, რეაგირება არ არის. იმას ნურავინ ნუ ელოდება, რომ ეს ხალხი დაიღლება და სახლში წავა, სანამ შედეგს არ მივიღებთ, ეს გამორიცხულია", — თქვა აქციის ერთ-ერთმა მონაწილემ ტელეკომპანია ფორმულასთან.

აქციის მონაწილეები იუსტიციის მინისტრისა და სამინისტროსგან ექსტრადირების ზუსტი თარიღის დასახელებას ითხოვენ. აჭარის მაუწყებლის ინფორმაციით, გუშინ, 3 ივნისს აქციის 4-მა მონაწილემ პირი ამოიკერა, ხოლო ჯამში 15 ადამიანი შიმშილობას აგრძელებს.

თურქმა სამართალდამცველებმა ლავას ოღლი მიმდინარე წლის ოქტომბერში, ტრაბზონში დააკავეს. მას ბრალი ედება სისხლის სამართლის კოდექსის 223-ე პრიმა მუხლის 2 ნაწილით, რაც გულისხმობს კანონიერ ქურდობას. ქუთაისის სასამართლომ მას დაუსწრებლად მიუსაჯა თავისუფლების აღკვეთა 12 წლის ვადით.

ადვოკატის ინფორმაციით, დაპატიმრების ვადა ლავასოღლის თურქეთში 28 თებერვალს ამოიწურა და ის საქართველოში უნდა გადმოეყვანათ. მისივე განმარტებით, ლავას ოღლი 28 თებერვალს გაათავისუფლეს და სადეპორტო სივრცეში გადაიყვანეს, საიდანაც საქართველოს ხელისუფლებას უნდა წაეყვანა, თუმცა 29 თებერვალს ის ისევ დააპატიმრეს და ციხეში დააბრუნეს.