ლეიბორისტული პარტიის ლიდერის, შალვა ნათელაშვილის თქმით, ყველა საფუძველი არსებობს, რომ შემოდგომაზე საქართველოში გაზაფხული დადგეს. ამ თემაზე მან სპეციალურ ბრიფინგზე ისაუბრა და აღნიშნა, რომ ოპოზიცია ერთიან მაჟორიტარულ კანდიდატებზე უნდა შეთანხმდეს.

"მინგრეულია ოლიგარქიულ-მაჟორიტარული სისტემა, ქვეყანა გადადის პროპორციულ არჩევნებზე, განთავისუფლდა პოლიტპატიმართა დიდი უმრავლესობა, რეჟიმის მეთაური ივანიშვილი სანქცირების კანდიდატია დასავლეთსა და აშშ-ში, ყველა საფუძველი გვაქვს იმისათვის, რომ შემოდგომაზე საქართველოში დავაყენოთ გაზაფხული", — თქვა შალვა ნათელაშვილმა.

ნათელაშვილის თქმით, ყველაფერი გაკეთდება, რომ უმრავლეს ოლქებში ოპოზიცია საერთო კანდიდატებზე შეთანხმდეს, რათა ივანიშვილის დამარცხება შეძლონ.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.