კავკასიური სახლი ევროპარლამენტარ ვიოლა ფონ კრამონის საპასუხო წერილს აქვეყნებს და აცხადებს, რომ ნაკლებ დიპლომატიური წერის სტილით იმედგაცრუებულები დარჩნენ. მათივე განცხადებით, ტექსტის სტილზე და აღქმაზე მსჯელობა უსასრულოდ შეიძლება, თუმცა შინაარსი "უმძიმეს რეალობას" ეხება.

კავკასიური სახლი წერილში აღნიშნავს, რომ ვიოლა ფონ კრამონის კეთილშობილურ მიზნებში ეჭვი არ ეპარებათ რისთვისაც მადლობას უხდიან მას და მთლიანად ევროკავშირს, თუმცა უჩნდებათ კითხვა: "რა შედეგი გამოიღო თქვენმა ძალისხმევამ?"

"მადლობას მოგახსენებთ საყოველთაოდ ცნობილი ჭეშმარიტების შეხსენებისთვისაც, რომ სამართლიან სასამართლოს დამნაშავეებიც იმსახურებენ. ისიც ცხადია, რომ ქართული ოცნების მართლმსაჯულება კრიტიკას ვერ უძლებს. და ფაქტი ფაქტად რჩება: შიდა თუ გარე მიზეზებით, საქართველოს პარლამენტში სააკაშვილის დანაშაულებრივი რეჟიმის მონაწილეები და მხარდამჭერები სხედან. და სამართლიანი სასამართლოც მათთვის არსებობს და არა რიგითი მოქალაქეებისთვის", — აღნიშნულია წერილში.

წერილში კიდევ ერთხელაა ხაზგასმული, რომ გიგი უგულავასა და ირაკლი ოქრუაშვილის გათავისუფლება და "მნიშვნელოვან პოლიტპატიმრებად" გამოცხადება "უზომო შეურაცხყოფასა და ტრავმას აყენებენ სააკაშვილის ავტორიტარული რეჟიმის მიერ წამებულ ადამიანებს და დახოცილთა ოჯახებს".

კავკასიური სახლი ვიოლა ფონ კრამონს წერს, რომ იქნებ მოიცალოს და კომენტარები გიგანტური ჰესებისა და წყალსაცავების მშენებლობაზე და უნიკალური ეკოსისტემის განადგურებაზეც გამოაქვეყნოს, ან ურჩიოს როგორ მოიქცნენ.

"სიამოვნებით გიმასპინძლებთ კავკასიურ სახლში, რათა უშუალოდ ვისაუბროთ იმის შესახებ, თუ რა მძიმე მდგომარეობაშია ის ქვეყანა, რომელმაც მრავალი მიზეზის გამო სააკაშვილის სასტიკი რეჟიმის მიმართ მართლმსაჯულების აღსრულება ვერ მოახერხა; რომელიც რუსეთის წინაშე ფაქტიურად მარტო დარჩა და ვერაფერს აკეთებს მცოცავი ოკუპაციის წინაღმდეგ; ქვეყანა, სადაც მასობრივი უმუშევრობა და სიღარიბე ბატონობს და რომლის სასიცოცხლო სივრცესაც ლამის ერთიანად ძირავენ წყალში", — აღნიშნულია წერილში.

წერილს სხვებთან ერთად კავკასიური სახლის გამგეობის თავმჯდომარე, ნაირა გელაშვილი აწერს ხელს. კავკასიის სახლის პირველ წერილს ვიოლა ფონ კრამონმა უპასუხა და მას "სიმცდარითა და დეზინფორმაციით გაჯერებული" უწოდა.

ამავე თემაზე: