ევროპარლამენტის წევრმა ვიოლა ვონ კრამონმა კავკასიური სახლის ღია წერილს უპასუხა და დასაწყისშივე აღნიშნა, რომ მისი წაკითხვით "იმედგაცრუებულია".

ავტორები წერილით მოუწოდებენ ევროპარლამენტარს, "ცალკეული კრიმინალების [გიგი უგულავასა და ირაკლი ოქრუაშვილის] ციხიდან დახსნის ნაცვლად", მათ დაუდგეს გვერდით, რათა გადარჩეს საქართველოს რეგიონები გიგანტური ჰიდროელექტროსადგურის მშენებლობისგას. წერილს სხვებთან ერთად კავკასიური სახლის გამგეობის თავმჯდომარე, ნაირა გელაშვილი აწერს ხელს.

ევროპარლამენტარი წერს, რომ მათი წერილი "სიმცდარითა და დეზინფორმაციით გაჯერებულია" და ამას მასთან წინასწარ შეთანხმებითა და განმარტების მოსმენით თავიდან აიცილებდნენ:

"მე, როგორც საქართველოს და მისი ხალხის უპირობო და უკომპრომისო მეგობარს, არაერთხელ გამომიხატავს ჩემი პოზიცია უახლეს მოვლენებზე. ყველაზე ცხადად იგი წარმოჩინდა ჩემს ვებგვერდზე 13 მაისს გამოქვეყნებულ განცხადებაში, რომელიც, ასევე, ფართოდ გააშუქა ქართულმა მედიამ.

სამწუხაროა, რომ თქვენ გადაწყვიტეთ გამოგეტოვებინათ ესოდენ მნიშვნელოვანი ნაბიჯი, რომელსაც განცხადების წაკითხვა ეწოდება. რომ არა ეს, ამაცილებდით მე ამ წერილის წერის, ხოლო საკუთარ თავს, ამ წერილის კითხვის უხერხულობას".

ევროპარლამენტარი შეახსენებს წერილის ავტორებს, რომ მისთვის კარგად ცნობილია "სააკაშვილის რეჟიმის სისასტიკე" და რომ გერმანიის პარლამენტში ყოფნისას, ხშირად აკრიტიკებდა საქართველოს ყოფილ ხელისუფლებას:

"ამის გამო მან და მისმა გუნდმა შემრაცხა პერსონა ნონ გრატად და აქტიურად (მაგრამ არა ყოველთვის წარმატებით) ცდილობდნენ საქართველოში ჩატარებულ ღონისძიებებში ჩემს დაბლოკვას. 2012-ში, მეც, მილიონობით ქართველის გვერდით, იმედით და კეთლი მოლოდინით შევყურებდი ქართულ ოცნებას. ვაი რომ იმედი გახუნდა".

ვიოლა ვონ კრამონი აცხადებს იმასაც, რომ მან კარგად იცის ნაციონალური მოძრაობის "საეჭვო მეთოდებზე" და ინფორმაციას იღებს ექპერტებისგან, მკვლევარებისგან, დიპლომატებისგან და ხშირად რიგითი ქართველებისგან:

"თქვენ ამტკიცებთ, რომ მე "აქტიურად ვლობირებდი რამდენიმე დატუსაღებული ქართველი პოლიტიკოსის გათავისუფლებას". ეს არის სრული და მტკნარი სიცრუე. არც ჩემს ოფიციალურ განცხადებაში და არც ინტერვიუებში არ მომითხოვია ვინმეს გათავისუფლება.

ასევე, სიცრუე როცა ამტკიცებთ, რომ მე თითქოს ვიღაც "პოლიტიკურ პატიმრად" გამოვაცხადე. არასოდეს გამომიყენებია ეს სიტყვები. მე ჩემს საქმიანობას ვეკიდები უდიდესი პასუხისმგებლობით, ხოლო თქვენი ქვეყნის მომავალს უდიდესი ზრუნვით. სწორედ ამიტომ ვარჩევ სიტყვებს მაქსიმალური სიზუსტით. ამავდროულად მოველი, რომ თქვენ აირჩევთ ამ სიტყვების სწორად წაკითხვას სანამ დაუსაბუთებელი ბრალდებების წაყენებას მიყოფდით ხელს".

ევროპარლამენტარი საქართველოს მთავრობას ურჩევს, დემოკრატიულ პრინციპებს სცეს პატივი და ჰქონდეს ობიექტური, გამჭვირვალე და პოლიტიკური ჩარევისგან თავისუფალი სასამართლო სისტემა:

"სამწუხაროდ, როგორც დამოუკიდებელი ექსპერტები და მკვლევარები ადასტურებენ, ამ სფეროებში ძალიან სამწუხარო უკან დახევის ტრენდი გამოიკვეთა".

რა ეწერა კავკასიური სახლის წერილში

წერილის დასაწყისში საუბარია კავკასიური სახლის ისტორიასა და იმაზე, რომ ევროპარლამენტარი ვიოლა ფონ კრამონი, როგორც ევროპის მწვანეთა პარტიის წევრი, თანამებრძოლად მიაჩნიათ. ისინი აღნიშნავენ რომ სწორედ ამიტომ სურთ, "საქართველოს მოსახლეობის მნიშვნელოვანი ნაწილის გულისტკივილის" გაზიარება:

"ბოლო რამდენიმე კვირის განმავლობაში თქვენ აქტიურად ლობირებდით რამდენიმე ქართველი პოლიტიკოსის გათავისუფლების საკითხს. თქვენმა განსაკუთრებულმა მონდომებამ, აქტიურობამ და აქამდე ჯერ არნახულმა ძალისხმევამ შედეგი გამოიღო, საქართველოს პრეზიდენტმა ორი დამნაშავე შეიწყალა და ციხიდან გამოუშვა. ვფიქრობთ, რომ თქვენ ბატონების – უგულავასა და ოქრუაშვილის – შესახებ სრულყოფილ ინფორმაციას არ ფლობთ და იმ პოლიტიკური ძლების გავლენის ქვეშ იმყოფებით, რომლებიც ყველანაირად ცდილობენ საქართველოს ექსპრეზიდენტის, ამჟამად სამართალში მიცემული მიხეილ სააკაშვილის ავტორიტარული რეჟიმის რეაბილიტაციას. [...]

პატივცემულო ქ-ნ ფონ კრამონ-ტაუბადელ, ჩვენთვის აბსოლუტურად გაუგებარია, რატომ დახარჯეთ ამდენი დრო და ენერგია ბიუჯეტის ქურდის, ქალაქის განადგურებასა და მშვიდობიანი დემონსტრაციების დარბევაში მრავალგზის მხილებული პირის, სისხლის სამართლის დამნაშავის გადარჩენისათვის, მისი პოლიტპატიმრის მანტიით შემკობისათვის".