ქართული ოცნების ერთ-ერთი ლიდერის, მამუკა მდინარაძე საკონსტიტუციო სასამართლოში ახალი მოსამართლის დანიშვნაზე კრიტიკას ეხმაურება და ამბობს, რომ არასამთავრობო ორგანიზაციებიც ოპოზიციის ნარატივში ხვდებიან.

"ოპოზიციას აქვს დალაგებული მესიჯბოქსი, რომელ ნარატივშიც, სამწუხაროდ, ე.წ. თავისუფალი, დამოუკიდებელი, მიუკერძოებელი არასამთავრობო სექტორის წარმომადგენლებიც ხვდებიან ხოლმე. ამოიჩემეს ეს სიტყვა კლანი და რატომ არის კლანი, სიღრმეებში არ მიდიან. [...] ლაპარაკობენ ამას და აქედან გამომდინარე, მათ ჰგონიათ, რომ თუ იტყვიან, რომ არის კლანი, აუცულებლად ყველა დაიჯერებს, რომ არის კლანი", — თქვა მამუკა მდინარაძემ.

მისი თქმით, არასამთავრობო ორგანიზაციებზე მსგავსი შემთხვევა აქამდეც ახსოვს, მაგალითად ბათუ ქუთელიაზე, რომელიც მისი თქმით, ნაციონალური მოძრაობის წარმომადგენელია თუმცა პოზიციონირებს, როგორც NGO სექტორის მიუკერძოებელი წარმომადგენელი.

საკონსტიტუციო სასამართლოში დღეს ახალი მოსამართლე, ვასილ როინიშვილი აირჩიეს. როინიშვილმა უარყო სასამართლოში კლანის არსებობა და თქვა, რომ მიხეილ ჩინჩალაძესთან კარგი ურთიერთობა აქვს. არასამთავრობო სექტორი უკვე დიდი ხანია სასამართლოში კლანის არსებობაზე საუბრობს. მიხეილ ჩინჩალაძეს კი ისინი კლანის ერთ-ერთ ხელმძღვანელად მოიაზრებენ.

როინიშვილის თქმით, მიხეილ ჩინჩალაძესთან კოლეგიალური და მეგობრული ურთიერთობა აქვს და ჯერ კიდევ მოსამართლეობამდე იცნობდა. მისი აზრით, ჩინჩალაძე ღირსეული ადამიანია.

"ჯერ ეს ერთი, მიშა ჩინჩალაძის გადასაწყვეტი არ იყო საკონსტიტუციო სასამართლოში მოსამართლის წარდგენა. იმას თუ მეკითხებით თქვენ მიშა ჩინჩალაძეს გაუხარდება თუ არა, ჩემი საკონსტიტუციო სასამართლოს მოსამართლეობა, ალბათ, გაუხარდება, როგორც მეგობარს. ისევე, როგორც მე გამიხარდებოდა მისი ახალი გამოწვევა", — განუცხადა მან ჟურნალისტებს.

ვასილ როინიშვილი 2008-2009 წლებში საქართველოს მთავარი პროკურორის მოადგილე იყო. მანამდე 2006-2008 წლებში კი აჭარის ავტონომიური რესპუბლიკის პროკურორი. სხვადასხვა დროს ის იყო, უზენაესი სასამართლოს მოსამართლე, უზენაესი სასამართლოს თავმჯდომარის მოადგილე, სამოქალაქო საქმეთა პალატის თავმჯდომარე, სადისციპლინო პალატის წევრი.