ამერიკის სახელმწიფო მდივანი, მაიკ პომპეო, მთავრობის სახელით საქართველოსა და ქართველ ხალხს დამოუკიდებლობის დღეს ულოცავს.

"შეერთებულ შტატებსა და საქართველოს აქვთ ძლიერი სტრატეგიული პარტნიორობა, რომელიც დაფუძნებულია საერთო ღირებულებებზე და თავისუფლების, დამოუკიდებლობის და ერთიანობის ღრმა სიყვარულზე. შეერთებული შტატებ ურყევად უჭერს მხარს საქართველოს სუვერენიტეტსა და ტერიტორიულ მთლიანობას. ჩვენ მხარს ვუჭერთ ქართველი ხალხის მკაფიო არჩევანს ევროატლანტიკური ინტეგრაციის პროცესში. შეერთებული შტატები აფასებს საქართველოს ინვესტიციებს თავდაცვისუნარიანობის განმტკიცებაში და მნიშვნელოვან წვლილს საერთაშორისო უსაფრთხოებაში, მათ შორის ავღანეთში ნატოს მისიაში. ქართველი ჯარისკაცები მამაცურად მსახურობდნენ და ჩვენ პატივს მივაგებთ ყველა ქართველს, რომლებმაც მსხვერპლი შესწირეს გლობალურ მშვიდობისა და უსაფრთხოებას", — წერია განცხადებაში.

განცხადებაში აღნიშნულია, რომ მომავალ წელს ამერიკა ურთიერთობის კიდევ უფრო გამდიდრებას ელის, რადგან საქართველო ატარებს რეფორმებს, რომელებიც დემოკრატიულ პრინციპებსა და კანონის უზენაესობას აძლიერებს. პომპეო აღნიშნავს, რომ ამერიკა უცვლელად უჭერს მხარს საქართველოს ეკონომიკურ განვითარებას და ძალისხმევას Covid-19-ის პანდემიისგან აღდგენის პროცესში.

პომპეოს წერილი ამერიკის სახელმწიფო დეპარტამენტის საიტზე გამოქვეყნდა.