დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, ქვეყანაში ცხელ წერტილად ქვემო ქართლის სამი მუნიციპალიტეტი: ბოლნისი, თეთრიწყარო და მარნეული რჩება. მისი განმარტებით, ამ სამ მუნიციპალიტეტზე მთელი ქვეყნის ინფიცირებულების 36% მოდის.

გამყრელიძის ინფორმაციით, აღნიშნული 3 მუნიციპალიტეტიდან კი ყველაზე მეტი ინფიცირებული ბოლნისშია.

"ყველაზე მაღალი ახალი ინფიცირებულთა რიცხვი გვაქვს ბოლნისში — 161 და 100 ათასს მოსახლეზე გადათვლით, ანუ ინდიკატორი ყველაზე მაღალი იქაა. შემდეგ მოდის თეთრიწყარო და შემდეგ მოდის მარნეული ამ ინდიკატორის საფუძველზე, ისე როგორც აბსოლუტურ რიცხვში. თეთრიწყაროში იყო 58 ინფიცირებული და მარნეულში 38", — განაცხადა გამყრელიძემ.

მისივე განმარტებით, თვითონ ბოლნისში ცხელი წერტილია ორი სოფელი: მუშევანი და გეტა, სადაც სერიოზული კვლევები მიმდინარეობს.

"გეტაში მთელი სოფლის მოსახლეობა, 320 ნიმუში გამოვიკვლიეთ და 18 დადებითი მაჩვენებელი იყო, ანუ 7%. ყველა გადაყვანილია საავადმყოფოებში და არიან საშუალო და მსუბუქი სიმძიმის.

რაც შეეხება სოფელ მუშევანს, ეს უფრო მოზრდილი სოფელია. აქ ჩვენ გამოვიკვლიეთ 522 ადამიანი, სულ 700-მდე მოსახლეა. დამყოლობა არ იყო ძალიან მაღალი და აქტიურად არ თანამშრომლობდნენ ამ გამოკვლევებზე, მაგრამ დავარწმუნეთ და დღესაც გრძელდება ეს და იქ 55 ადამიანს, ანუ 10%-ში გვაქვს დადებითობის ყველაზე მაღალი მაჩვენებელი გვაქვს. ყველა გადაყვანილია საავადმყოფოებში და მიმდინარეობს მათი მკურნალობა", — განაცხადა გამყრელიძემ.

მისივე თქმით, ქვეყანაში კორონავირუსით 12 გარდავლილიდან 3 ბოლნისიდან იყო.

"ამიტომ, დღესდღეობით ისევს რჩება ჩაკეტილი და დარჩება 2 ინკუბაციური პერიოდის განმავლობაში სოფელი მუშევანი და გეტა. სანამ ყველა არ გამოვიკლევთ, ყველას იდენტიფიცირება და მკრურნალობა არ მოხდება და ბოლო შემთხვევიდან ორი 14-დღიანი პერიოდის შემდეგ შეიძლება დაისვას საკითხი ამ სოფლების გახსნაზე", — განაცხადა გამყრელიძემ.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: