საქართველოს პარლამენტის თავმჯდომარის ინფორმაციით, პრემიერმინისტრი გიორგი გახარია საკანონმდებლო ორგანოში 27 მაისს მივა და კორონავირუსთან დაკავშირებით სრულ ანგარიშს წარადგენს. ასევე, არჩილ თალაკვაძემ მიმართა ოპოზიციას, რომ მათ ნებისმიერი კითხვის დასმა შეეძლებათ.

"ჩვენ მოვისმენთ კოვიდთან დაკავშირებულ სრულ ანგარიშს, იმის შესახებ, თუ რა გაკეთდა და იმის შესახებაც თუ რისი გაკეთება იგეგმება მომავალში, იქნება სრულფასოვანი პოლიტიკური დისკუსია, პოლიტიკური დებატები და მთავრობასთან, მთავრობის წევრებთან ერთად, თითოეულ თქვენგანს ექნება საშუალება, რომ დასვას ნებისმიერი კითხვა, რომელიც ამ პროცესთან მიმართებაში ჰქონდა და მიიღოს პასუხები", — თქვა თალაკვაძემ.

მისივე ინფორმაციით, გახარია პარლამენტში მივა 29 მაისსაც, რადგან ფრაქციებმა კითხვებზე პასუხი ინტერპელაციის წესით მოითხოვეს.

"მიუხედავად იმისა, რომ სკეპტიკური განცხადებები კეთდებოდა წინა დღეებში, თითქოს პარლამენტს არანაირი ანგარიშვალდებულება აღარ რჩება და პრემიერმინისტრი და მთავრობა აღარ მოდის პარლამენტში, ხედავთ, რომ ეს ასე არ არის. რეალურად, როგორც კი ვუბრუნდებით ნორმალურ სამუშაო რეჟიმს, ანგარიშვალდებულების ყველა მექანიზმი იქნება, რასაკვირველია, გამოყენებული", — აღნიშნა მან.