კონგრესმენი ადამ კინზინგერი, ამბობს, რომ რომელიმე მხარეს არ აირჩევს და მისთვის მთავარი 8 მარტის შეთანხმების შესრულებაა. ამ თემაზე კინზინგერის ინტერვიუ და თარგმანი მთავარმა არხმა გაავრცელა.

"დეტალებში არ შევალ, მე არც რომელიმე მხარეს ავირჩევ, მაგრამ კიდევ ერთხელ ვიტყვი, რომ მთავარი შეთანხმების შესრულებაა. მჯერა, რომ ის საარჩევნო სისტემა, რომელზეც დაპირება გაიცა და პირობები, რომელზეც შეთანხმება იყო ყველასთვის ცნობილია და ეს ოფიციალურად გაცხადდა კიდეც", — თქვა ადამ კინზინგერმა.

კონგრესმენის თქმით, ის მოლაპარაკებებში არ მონაწილეობდა და შეიძლება ყველა დეტალი არ იცის, მაგრამ მისი აზრით, ორივე მხარემ ყველაფერი გააკეთა, რომ შეთანხმება მშვიდობიანად შემდგარიყო. კონგრესმენმა აღნიშნა, რომ სწორედ მშვიდობაა ის ერთადერთი, რაც ორივე მხარეს და ქართველ ხალხს შედეგს მოუტანს.

ადამ კინზინგერი იმედოვნებს, რომ ოქტომბერში არჩევნებისთვის საქართველოში ჩამოსვლას შეძლებს.