პრემიერ მინისტრის, გიორგი გახარიას თქმით, ქვეყანას გარკვეული შეზღუდვები სჭირდება და არა საგანგებო მდგომარეობა და კომენდანტის საათი. მისი თქმით, ეპიდემიოლოგიური მდგომარეობა გარკვეული შეზღუდვების შენარჩუნებას მოითხოვს, რადგან კორონავირუსი დამარცხებული არაა.

"უნდა გვესმოდეს, რომ ჩვენი წარმატების ფასი ნული იქნება, თუ ჩვენი გაუაზრებელი სწრაფი ყოვლისმომცველი შეზღუდვების ერთბაშად მოხსნით ქვეყანას, თითოეულ მოქალაქეს და ქვეყნის შემდგომი აღორძინების საქმეს შევიყვანთ რისკის ქვეშ. ამიტომ ჩვენ ეს შეზღუდვები გვჭირდება, მაგრამ ამავე დროს ჩვენ არ გვჭირდება საგანგებო მდგომარეობა და კომენდანტის საათი. ამიტომ მივმართეთ პარლამენტს, რომ ეს შეზღუდვები გონივრული, ეფექტური და კონკრეტულ მიზნებზე მიმართული", — თქვა გიორგი გახარიამ.

პრემიერმა კითხვას, ახალი შეზღუდვების კანონპროექტი შეეხება თუ ადამიანების შეკრებას, მათ შორის აქციების გამართვას, უპასუხა, რომ მასში "გამოხატვის თავისუფლების შეზღუდვა არ შევა".

პარლამენტში ინიცირებული კანონპროექტის მიხედვით, ხელისუფლებას გარკვეული უფლებები საგანგებო მდგომარეობის გამოცხადების გარეშე ეძლევა. მათ შორისაა მიმოსვლის, საკუთრების, სოციალური ღონისძიების მიზნით თავშეყრის შეზღუდვის შესაძლებლობაც.

კანონპროექტის ავტორი ქართული ოცნების დეპუტატი დიმიტრი ხუნდაძეა. მას ორი კანონის შეცვლა სურს — კანონი საზოგადოებრივი ჯანმრთელობის შესახებ და სისხლის სამართლის საპროცესო კოდექსი.