დღეს, 18 მაისის სხდომაზე გიორგი რურუას ადვოკატი, დიმიტრი საძაგლიშვილი ბრალდებულისთვის აღკვეთის ღონისძიების შეცვლის შუამდგომლობას დააყენებს. მისი თქმით, ამის სამართლებრივი საფუძველი არსებობს. კერძოდ, ადვოკატის მტკიცებით, ბრალდების მოწმეებიც კი არ ადასტურებენ, რომ ჩხრეკის პროცესი დაინახეს.

დიმიტრი საძაგლიშვილის თქმით, რურუა უკანონო პატიმარია და მისთვის გირაოს მოთხოვნასაც არ აპირებენ. დღევანდელ სხდომაზე, ასევე, ბრალდების მხარის მოწმეებს დაკითხავენ.

"ჩვენ დავაყენებთ გიორგი რურუას გათავისუფლების შუამდგომლობას და მოვითხოვთ მის გათავისუფლებას. რაც შეეხება მოლოდინებს, ჩვენ ექვსი თვეა მოლოდინი გვაქვს, რომ ის გათავისუფლდება, თუმცა არ ვიცი ეს დღეს რამდენად მოხდება. აუცილებლად დადგინდება სიმართლე და გაირკვევა, რომ გიორგის ცეცხლსასროლი იარაღი არ ჰქონია და მას უბრალოდ ჩაუდეს იარაღი", — აღნიშნა ადვოკატმა.

დაცვის მხარის მოთხოვნის საპირისპიროდ, პროკურორი ვასილ სამხარაძე ამბობს, რომ აღკვეთი ღონისძიების შეცვლის საფუძველი არაა და მას არ დაეთანხმებიან.

8 მარტის შეთანხმებისა და საკონსტიტუციო ცვლილებების მიღების გამო ოპოზიციასა და მმართველ გუნდს შორის კიდევ ერთხელ გახდა განხილვის საგანი. ოპოზიციაში აცხადებდნენ, რომ შეთანხმების მიღწევიდან ორი თვის თავზე ქართული ოცნება პირობებს არ ასრულებს, რადგან პოლიტპატიმრები კვლავ ციხეში არიან. კერძოდ საუბარია გიგი უგულავაზე, ირაკლი ოქრუაშვილსა და გიორგი რურუაზე.

ნაციონალური მოძრაობა და ევროპული საქართველო აცხადებდნენ, რომ პატიმრების გათავისუფლების გარეშე საკონსტიტუციო ცვლილებებს მხარს არ დაუჭერდნენ.

ოპოზიციის საპასუხოდ, პარლამენტის თავმჯდომარე აცხადებდა, რომ მმართველ გუნდს პატიმრების გათავისუფლების პირობა არავითარი ფორმით, არავის წინაშე არ დაუდია. თალაკვაძის მტკიცებით, ამას მკაფიოდ ადასტურებს ყველა ფაქტი და დოკუმენტი, მათ შორის თავად შეთანხმების ტექსტი. ქართული ოცნების წარმომადგენლები საუბრობდნენ იმაზეც, რომ ოპოზიციის მოთხოვნა სასამართლოსთვის დავალების მიცემას გულისხმობს, რასაც არ გააკეთებენ.

დისკუსიას გამოეხმაურნენ საელჩოებიც. მოლაპარაკებებში ჩართული დიპლომატების ერთობლივ განცხადებაში მითითებულია, რომ შეთანხმება შედგება ორი ნაწილისგან: ერთი ფოკუსირებულია საარჩევნო სისტემაზე, მეორე კი ყურადღებას ამახვილებს იმ საკითხების გადაჭრაზე, "რაც სასამართლო სისტემაში პოლიტიკურ ჩარევას ჰგავს". საელჩოებმა მოუწოდეს ყველა მხარეს, სრულად დაიცვან შეთანხმების ორივე ნაწილი, რათა ის წარმატებით განხორციელდეს.

რამდენიმედღიანი განხილვის შემდეგ 15 მაისს საქართველოს პრეზიდენტმა, სალომე ზურაბიშვილმა გიგი უგულავა და ირაკლი ოქრუაშვილი შეიწყალა. როგორც ზურაბიშვილმა განმარტა, ის არ იწყალებდა პოლიტპატიმრებს. პრეზიდენტის გადაწყვეტილება გააკრიტიკეს მმართველ გუნდში და ამტკიცებდნენ, რომ ზურაბიშვილთან შეწყალებაზე კონსულტაციები არ ჰქონიათ.

უგულავასა და ოქრუაშვილის გათავისუფლებას დადებითად გამოეხმაურნენ ოპოზიციაში. ამავე დროს, ისინი აცხადებენ, რომ ახლა აუცილებელია რურუას გათავისუფლება, წინააღმდეგ შემთხვევაში, პირობა შესრულებად არ მიიჩნევა.

8 მარტს, ხანგრძლივი განხილვების შემდეგ, ოპოზიციამ და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.