32 წლის ტრანსგენდერი ქალი, რომელსაც 14 ოქტომბერს, ღამით, თბილისში ფიზიკურად გაუსწორდნენ, გარდაიცვალა. თავდასხმის მსხვერპლს დაზიანებები თავზე ჰქონდა მიყენებული, ყელი კი - გამოჭრილი.

ტრანსგენდერი ქალი, რომელსაც საზოგადოება ზიზის სახელით იცნობდა, 40 დღის განმავლობაში კომაში იყო და ხელოვნური სუნთქვის აპარატზე იმყოფებოდა.

18 ოქტომბერს შსს-მ მისი განზრახ მკვლელობის მცდელობის ბრალდებით, 1985 წელს დაბადებული, წარსულში ნასამართლევი, ამჟამად პირობითი მსჯავრის ქვეშ მყოფი პირი დააკავა, რომელსაც წინასწარი პატიმრობა შეუფარდეს.

მოსამართლემ ბრალდებულ გიორგი მურჯიკნელის ქცევა "საზოგადოებისთვის მომატებულ საფრთხედ" შეაფასა და მისი იზოლირება მიიჩნია საჭიროდ.