იუსტიციის მინისტრის, თეა წულუკიანის თქმით, ოპოზიციასა და ხელისუფლებას შორის მოლაპარაკებების დროს პატიმრებთან დაკავშირებით "არა თუ დაპირება", არამედ დისკუსიაც არ ყოფილა. საზოგადოებრივი მაუწყებლის ეთერში მინისტრმა მოყვა, როგორ გამოართვა ერთ-ერთ რაუნდზე გრიგოლ ვაშაძეს 60 კაციანი სია, რომელთაგან არცერთი ადამიანი საპატიმროში არ აღმოჩნდა.

"იქ მყოფ, მეორე მხარეს მსხდომ მამაკაცებს შორის ყველაზე ერთ-ერთი თავაზიანობით გამოირჩეოდა ბატონი გრიგოლ ვაშაძე, რომელმაც ერთ მშვენიერ დღეს ამოაძვრინა თავისი ქაღალდებიდან რაღაც სია და პატიმრებზე დაიწყო საუბარი დაიწყო. მე, როგორც მთავრობის წარმომადგენელმა, რადგან სხვა ამ ტვირთს ვერ იკისრებდა, რადგან პარლამენტი არანაირ კავშირში არაა ძალოვან სტრუქტურებთან.

მას ეს სია ჩემივე ინიციატივით გამოვართვი, წამოვიღე და სია დამუშავდა. მოლაპარაკების შემდეგ რაუნდზე ეს სია მივიტანე და უცხოელების გასაგონად ვუპასუხე, რომ მის სიაში ჩამოთვლილი გვარ-სახელები საერთოდ არ იმყოფებოდნენ საპატიმროში. მას სახე ჰქონდა შეფაკლული, ასე ვიტყოდი და ამით ამოიწურა ეს თემა", — თქვა თეა წულუკიანმა.

თეა წულუკიანმა აღნიშნა, რომ ამ შეხვედრის შემდეგ ის მოლაპარაკებებში ჩართული აღარ ყოფილა. მისი თქმით, მომლაპარაკებლებს, არჩილ თალაკვაძესა და ირაკლი კობახიძეს, ჰქონდათ ის ინსტრუქციები, რომლებზეც დღეს საუბრობენ.