დროა, მოვემზადოთ უკანასკნელი კასეტის მოსასმენად: 13 Reasons Why-ის ფინალური სეზონის პრემიერა 5 ივნისს შედგება!

მეოთხე სეზონში მაყურებლებისთვის კარგად ნაცნობი პერსონაჟები სწავლის დასრულებისთვის ემზადებიან, თუმცა სანამ ერთმანეთს და სკოლას დაემშვიდობებიან, მანამდე სახიფათო საიდუმლოს დამალვა მოუწევთ. ამავდროულად კი ის მნიშვნელოვანი გადაწყვეტილებები უნდა მიიღონ, რომლებიც მათ ცხოვრებას საბოლოოდ შეცვლის.

როგორც მოსალოდნელი იყო, ფინალურ სეზონში ერთმანეთზე უფრო ემოციური ისტორიები განვითარდება. ამას მოწმობს ნეტფლიქსის მიერ სულ ახლახანს გავრცელებული ვიდეოც, სადაც ჩანს, თუ როგორ განიცადა შემოქმედებითმა გუნდმა სცენარის წაკითხვის შემდეგ გმირების საბოლოო ბედი:

13 Reasons Why ეკრანებზე პირველად 2017 წელს გამოჩნდა და მილიონობით მაყურებლის ყურადღება მიიქცია. სერიალი ამერიკელი მწერლის ჯეი აშერის ამავე სახელწოდების მქონე წიგნის მიხედვით გადაიღეს, რომელიც თინეიჯერების ცხოვრების პირქუში დეტალების შესახებ მოგვითხრობს.

მეოთხე სეზონში სულ 10 ეპიზოდი იქნება და ამის შემდეგ ერთგულ მაყურებლებს საბოლოოდ მოუწევთ საყვარელ პერსონაჟებს გამოემშვიდობონ.