საქართველოს პრემიერ მინისტრი, იუსტიციის მინისტრთან ერთად, ლონდონში ანტიკორუფციულ სამიტზე იმყოფება. სამიტი დღეს, 12 მაისს, გაიხსნა და მას დიდი ბრიტანეთის პრემიერ მინისტრი, დევიდ ქემერონი მასპინძლობს.

ბრიტანეთის მთავრობის ინფორმაციით, აღნიშნული სამიტის მიზანი კორუფციასთან საბრძოლველად გლობალური ზომების მიღებაა. ამასთან, ღონისძიებაზე შეთანხმების პაკეტსაც მიიღებენ, რომელიც კორუფციასთან ბრძოლის პროცესში, შემდეგ საკითხებს შეეხება: კორპორაციული საიდუმლოება, სახელმწიფოს საქმიანობის გამჭვირვალობა, საერთაშორისო ანტიკორუფციული კანონების შესრულება და საერთაშორისო ინსტიტუტების გაძლიერება.

ანტი-კორუფციული სამიტი პირველი ამ ტიპის ღონისძიებაა. შეხვედრაზე მსოფლიო ლიდერები, ბიზნესმენები და სამოქალაქო საზოგადოების წევრები იმისთვის შეიკრიბნენ, რომ რამდენიმე პრაქტიკული ნაბიჯის გადადგმასთან დაკავშირებით შეთანხმებას მიაღწიონ. ესენია:

  • გამოამჟღავნონ კორუფცია ისე, რომ ამ სახის დანაშაულის დამალვისათვის სივრცე აღარსად დარჩეს.
  • კორუფციის ჩამდენები დაისაჯონ, ხოლო კორუფციის მსხვერპლ პირებს მხარი დაუჭირონ.
  • აღმოფხვრან კორუფცია ყველგან, სადაც ის არსებობს.

სამიტში გიორგი კვირიკაშვილი 40 ქვეყნის ლიდერთან ერთად მონაწილეობს, რომელთა შორის იმყოფებიან ნორვეგიის პრემიერ მინისტრი ერნა სოლბერგი, ბულგარეთის პრემიერ მინისტრი ბოიკო ბორისოვი, მალტის პრემიერმინისტრი ჯოზეფ მუსკატი, აშშ-ის სახელმწიფო მდივანი ჯონ ქერი და სხვები.

ღონისძიებაზე გიორგი კვირიკაშვილი დამსწრე საზოგადოებას სიტყვით მიმართავს.