მედიის განვითარების ფონდი (MDF) საქართველოს მოქალაქეებს ნაციზმზე გამარჯვების დღის 8 მაისს აღნიშვნისკენ მოუწოდებს.

ფონდმა აღნიშნულ ინიციატივასთან დაკავშირებით ვიდეორგოლი მოამზადა, სადაც საუბარია იმაზე, თუ როგორ იქცა მეორე მსოფლიო ომში დაღუპულთა ხსოვნის დღე კრემლის მიერ დაფინანსებული მოძრაობის — უკვდავი პოლკის მიერ რუსული გავლენების გაძლიერების საშუალებად.

როგორც MDF აცხადებს, საქართველოს მოქალაქეებმა უკვდავი პოლკის შესახებ სიმართლე უნდა იცოდნენ.

"ჩვენ ყოველთვის უნდა გვახსოვდეს მეორე მსოფლიო ომში მონაწილე ქართველების გმირობა და თავგანწირვა. მაგრამ ქართველებმა დაღუპულთა ხსოვნას თავადვე უნდა მივაგოთ პატივი. აღმაშფოთებელია, რომ ჩვენი გმირების ხსოვნას უცხო ქვეყნის ძალა თავისი ინტერესებისვთის იყენებს. საქართველოს მოქალაქეებმა უნდა იცოდნენ სიმართლე უკვდავი პოლკის შესახებ, დროა, აიკრძალოს წმინდა გიორგი ლენტი, როგორც ეს გააკეთა უკრაინამ და როგორც ევროპის ბევრ ქვეყანაში გამარჯვების დღე 8 მაისს აღვნიშნოთ. რადგან სასწორზე დევს არა მხოლოდ ჩვენი წარსული, არამედ ჩვენი მომავალი", — ნათქვამია ვიდეორგოლში.

უკვდავი პოლკი

უკვდავი პოლკი არის მოძრაობა, რომელიც თავის მთავარ მიზნად "სამამულო ომში" დაღუპულთა ხსოვნის უკვდავყოფას ასახელებს. პოლკის იდეა 2011 წელს გაჩნდა. კრემლის ფინანსური მხარდაჭერით 2015 წლიდან საერთაშორისო მასშტაბის გახდა და 17 ქვეყანაში გაიმართა. 2017 წელს პოლკს ქართული დანაყოფიც შეემატა. ტრადიციულად, პოლკი მსვლელობებს ატარებს საქართველოს ოკუპირებულ რეგიონებშიც.

რუსეთის პრეზიდენტი ვლადიმერ პუტინი ამბობდა, რომ ეს მოძრაობა "ისტორიული სიმართლის დაცვას ემსახურება", რომელმაც "საზოგადოება და ხალხები სულიერად უნდა შეადუღაბოს და ისტორიის რევიზიის უფლება არავის მისცეს". საბოლოოდ, პოლკი რუსული პროპაგანდის იარაღად იქცა.

პოლკის ოფიციალურ საინფორმაციო ვებგვერდზე საქართველოს ოკუპირებული ტერიტორიები დამოუკიდებელ სახელმწიფოებად არის წარმოდგენილი.