საქართველოს საგარეო საქმეთა სამინისტროს ცნობით, ჩინური მხარემ მედიის მხრიდან საქართველოს არასწორი ინტერპრეტაციით ხსენებას ემიჯნება. მათივე ინფორმაციით, ამის შესახებ საგარეო საქმეთა მინისტრის მოადგილემ, ალექსანდრე ხვთისიაშვილმა საქართველოში ჩინეთის სახალხო რესპუბლიკის ელჩთან ლი იენთან შეხვედრისას ისაუბრა.

მათივე ინფორმაციით, შეხვედრისას განსაკუთრებული ყურადღება გამახვილდა რუსეთის ფედერაციის მხრიდან საქართველოსთან დაკავშირებით მცდარი ინფორმაციის პროპაგანდაზე, რაც განსაკუთრებით გამძაფრდა პანდემიის დროს და შეეხო საქართველოსთვის ისეთ მნიშვნელოვან სამედიცინო და სამეცნიერო დანიშნულების ობიექტს, როგორიც ლუგარის ლაბორატორიაა.

"აღინიშნა, რომ სამწუხაროდ რუსეთის ფედერაცია განაგრძობს საერთაშორისო საზოგადოების შეცდომაში შეყვანის მცდელობას, რომელსაც სამწუხარო გამოხმაურება მოჰყვა ჩინეთის მედიასაშუალებებში", — აცხადებენ საგარეო საქმეთა სამინისტროში.

მათივე ცნობით, ჩინურ მხარეს მიეწოდა დამატებითი დეტალური ინფორმაცია საქართველოს დაავადებათა კონტროლის და საზოგადოებრივი ჯანმრთელობის ეროვნული ცენტრის, ასევე ლუგარის ლაბორატორიის მუშაობის და მნიშვნელობის შესახებ არა მარტო საქართველოსთვის, არამედ რეგიონისთვის.

"ხაზგასმით აღინიშნა მიმდინარე პერიოდში ლუგარის ლაბორატორიის მნიშვნელობა და მისი ეფექტური საქმიანობა კოვიდ-19-ის პანდემიის პრევენციის და დამარცხების კუთხით, ასევე ცენტრის თანამშრომლობა მსოფლიოს სხვადასხვა ქვეყნის შესაბამის ლაბორატორიებთან და მედიკოსებთან გამოცდილების გაზიარების კუთხით", — ნათქვამია სამინისტროს განცხადებაში.

ჩინეთის საგარეო საქმეთა სამინისტროს სპიკერმა გენგ შუანგმა 29 აპრილის პრესკონფერენციაზე განაცხადა, რომ პოსტსაბჭოთა ქვეყნებში არსებული ამერიკის ბიოლოგიური ლაბორატორიები მეზობელი ქვეყნებისთვის რისკს ქმნის.

ამავე თემაზე: