პარტია ერთიანი ნაციონალური მოძრაობის განცხადებით, შსს-მ 1-ელ ოქტომბერს ე.წ რიყის დოქებთან აქციის ჩატარებაზე ნებართვა არ გასცა. პარტიის განცხადებით, ისინი მაინც შეიკრიბებიან.

ენმ აქციას საქართველოს მე-3 პრეზიდენტის, მიხეილ სააკაშვილის დაკავებიდან მე-5 წლისთავზე მართავს. პარტიის დროებითი საბჭოს თავმჯდომარის, ირაკლი ფავლენიშვილის განცხადებით, აქციის ადგილს, რიყის დოქებს სიმბოლური დატვირთვა აქვს.

"რა ტექნიკური დაბრკოლებაც არ უნდა შეგვიქმნან, ჩვენ აუცილებლად მივალთ რიყის დოქებთან, რომელიც იქცა საქართველოს გაპარტახების, გაძარცვის სიმბოლოდ. დღეს თაღლითობის, ძარცვის ჰაბად და ცენტრად აქცია ივანიშვილმა ეს ქვეყანა, რომელიც იყო წინსვლის, ევროპული ინტეგრაციის, კორუფციის და კრიმინალის დამარცხების სიმბოლო. რიყის დოქები იქნებოდა დღეს მოდერნიზებული, თანამედროვე, ძლიერი ქართული სახელმწიფოს და თბილისის სიმბოლო. ახლა არის გაპარტახებული და სამწუხაროდ, გაძარცული ქვეყნის სიმბოლო.

აუცილებლად მივალთ რიყის დოქებთან, აუცილებლად შევიკრიბებით 1-ელ ოქტომბერს 5 საათზე და ყველა იმ ადამიანს, ვისაც გაცნობიერებული აქვს მიხეილ სააკაშვილის პატიმრობის მნიშვნელობა ჩვენი ქვეყნისთვის, მისი თავისუფლების მნიშვნელობა, მის ისტორიულ წვლილი და ანტიქართული რეჟიმის მოშორების აუცილებლობა, კვლავინდებურად გეპატიჟებით," — განაცხადა ირაკლი ფავლენიშვილმა.

შეგახსენებთ, 13 ივლისს "რიყის დოქების" დემონტაჟზე მერიის არქიტექტურის სამსახურმა ნებართვა გასცა. თბილისში რიყის პარკში მდებარე 14,591 კვადრატულ მეტრზე არსებული ობიექტს შპს "რიყე დომ"-ის საკუთრებაშია. ირაკლი კობახიძის 2025 წლის 6 მაისის განკარგულების თანახმად, "რიყის დოქების" საპრივატიზაციო პირობების შესრულების მიზნით ადგილზე არანაკლებ 44 მლნ ლარის ინვესტიცია განხორციელდება. განკარგულებაში ასევე ვკითხულობთ, რომ ადგილზე უძრავი ქონების განვითარება უნდა მოხდეს არა უგვიანეს 2030 წლის 10 მაისისა, რაც მოიცავს სასტუმროს შექმნას, სამშენებლო სადემონტაჟო სამუშაოებს და სასტუმროს ფუნქციონირების დაწყებას.