თავისუფალი ხალხის პარტიის (ყოფილი გირჩი) ერთ-ერთი ლიდერი ალექსანდრე რაქვიაშვილი სოციალურ ქსელში წერს, რომ IRI-მა კვლევა ჩაატარა, რომლის მიხედვითაც ქართულ ოცნებას 36% აქვს, ხოლო ოპოზიციურ პარტიებს ჯამში დაახლოებით ორჯერ ნაკლები.

"IRI-ს კვლევა ჩაუტარებია და მიდის ჩხუბი ოპოზიციაში. თურმე ქოცებს 36% აქვთ და ოპოზიციას ჯამში ორჯერ ნაკლებიო. იქ ლელო არ იზომებაო, ჩერგო გიჟს გავსო, რადგან არა 20%, არამედ 0 უწერიაო და ა.შ.

ჰოდა, ამდენი ხანი ამომრჩეველი რომ ტყუილში აცხოვრე, "გაყალბდაო" ყვიროდი და ვერაფერი დაამტკიცე, პროტესტის პირველი და მეორე ფაზებიო, ჯარიმებით დავღლითო, ცხელი გაზაფხულიო და ასე ტყუილი ტყუილზე და არაფერზე ბოდიში, არაფერზე მონანიება, არაფერზე აღიარება.. და რა უნდა მომხდარიყო, რეიტინგი გაიზრდებოდა? მაგი კი არა, ისიც კი ვერ გაურჩევია ოპოზიციურ მედიას, თუ ვინ ვინაა ოპოზიციაში და ახლა უკვირთ, რომ ის, ვინც ნაღდი ოპოზიციონერები ჰგონიათ, რეიტინგებში არც კი ჩანს. ჰოდა, თუ ისევ სირაქლემას პოზაში იქნება მედია და შავისა და თეთრის გარჩევას არ დაიწყებს, კიდევ ბევრი არასასიამოვნო სიურპრიზი ელის წინ.

თუმცა მთავარი არა ლელოს ან გვარამიას თანდათანობითი გაქრობაა, არამედ ის, რომ ბევრი ადამიანი, ვინც 2024 შეცდა და 4-5-9-25-კამპანიას აყვა, ახლა ხვდება შეცდომას და სწორი არჩევანის გაკეთება სურს. ჰოდა, თუ ასეთები ამ ჯგუფში ხართ, არ მოგერიდოთ. დასვით კითხვა, დაწერეთ, თუ რა გიშლით ხელს, რომ 36 გააფერადოთ და აუცილებლად გიპასუხებთ, რადგან შანსი არაა, თავისუფალი ხალხის პარტიაზე უკეთესი არჩევანი არსებობდეს დღეს საქართველოში.

და, რა თქმა უნდა, მადლობა ჩვენ ერთგულ ამომრჩეველს, რომელიც მრავალი წელია გვაფინანსებს და გვიჭერს მხარს. თქვენი წყალობით, ქართველ ხალხს აქამდეც ჰქონდა და კიდევ ექნება შანსი, სწორი არჩევანი გააკეთოს", — წერს რაქვიაშვილი.

თავადვე ავრცელებს სლაიდს, რომელშიც IRI-ის კვლევის პარტიულ რეიტინგებში ქართულ ოცნებას 36% აქვს, ნაციონალურ მოძრაობას — 5%, 2-2% აქვთ: იაგო ხვიჩიას პარტია გირჩს, ლეიბორისტულ პარტიას, გიორგი გახარიას პარტიას საქართველოსთვის და პარტია ახალს, 1-1% აქვთ: ანა დოლიძის პარტიას ხალხისთვის და ზურაბ ჯაფარიძის გირჩი – მეტი თავისუფლება, სტრატეგია აღმაშენებელს და ხალხის პარტიას. რეიტინგებში მოცემული არ არის ლელო და ფედერალისტები.

შეგახსენებთ, რომ IRI-ს აღნიშნული კვლევა ჯერ არ გაუსაჯაროებია.