ევროპული საქართველოს ერთ-ერთი ლიდერის, გიგა ბოკერიას განცხადებით, მთავრობის ანტიკრიზისული გეგმა არის დაგვიანებული, ბუნდოვანი და არასწორი კრიტერიუმებით შედგენილი. ამის შესახებ მან დღეს გამართულ პრესკონფერენციაზე ისაუბრა.

დეპუტატის თქმით, ერთიანი მოჭრილი თანხა არ უნდა ჩაერიცხოთ იმ ადამიანებს, ვინც საშემოსავლო გადასახადს იხდის. ევროპული საქართველოს პოზიციაა, რომ ვინც დაკარგა ხელფასი, იმათ ზარალის ნახევარი აუნაზღაურდეთ.

"სადაც ადვილია აღნუსხვა, ვის რამდენი ჰქონდა შემოსავალი, ვინ სად მუშაობდა, იქ 200-ლარიანი დახმარება არის აბსოლუტურად არალოგიკური, არასაკმარისი, მცირე რა თქმა უნდა. მთავარი ის არის, რომ ვისაც ჰქონდა ხელფასი 400 ლარი ან 300 ლარი, მისთვის 200 ლარი შეიძლება სერიოზული რაღაც იყოს. მაგრამ ადამიანი ან ოჯახი, რომელსაც ჰქონდა 1000-1500 ლარი შემოსავალი, 200 ლარით საშუალო კლასი წონასწორობას ვერ შეინარჩუნებს", — ამბობს ის.

დეპუტატი აღნიშნავს, რომ ევროპული საქართველოს გეგმაში არის ნაპოვნი შესაბამისი ხარჯები იმისთვის, რომ ვინც ხელფასი დაკარგა, ზარალის ნახევარი აუნაზღაურდეს, რათა მათ ფინანსური წონასწორობის შენარჩუნების შანსი ჰქონდეთ.

"წინააღმდეგ შემთხვევაში, თუ მოირღვა საშუალო კლასი, 1000-1500 ლარიანი ხალხი, ეს მერე მოქმედებს მთელ ეკონომიკაზე და უფრო გაჭირვებულებზეც. ამიტომ ასეთი მოჭრილი თანხა იმათთვის, ვინც საშემოსავლოს იხდიდა, არის არასწორი და მცირე", — აღნიშნავს ის.

რაც შეეხება თვითდასაქმებულების კომპენსაციას, გიგა ბოკერია ამბობს დახმარების მისაღებად თვითდასაქმების დასაბუთების აუცილებლობა, ასევე, ფიზიკურ პირებზე მომუშავე ადამიანებისთვის კომპენსაციის არმიცემა "ნიშნავს უკეთეს შემთხვევაში ქაოსს და გაჭიანურებას, უარეს შემთხვევაში, ეს იქნება კორუფციის, ნეპოტიზმის და ათასი უბედურების წყარო".

დეპუტატის თქმით, მთავრობამ ანტიკრიზისული გეგმა დააგვიანა და არგუმენტი, რომ ვითარება იცვლება და გეგმის მოთხოვნა პოპულიზმია, "სისულელეა". დეპუტატის თქმით, გეგმა ვითარების ცვლილების მიხედვით შეიძლებოდა შეცვლილიყო და მოქალაქეებს და ბიზნესს უნდა სცოდნოდა, რა გზით მიდიოდა მთავრობა.

"ახლა ირკვევა, რომ ამ გეგმაში, რომელიც ისედაც სადღეგრძელოსავით იყო, არც ხარჯები ჰქონდათ მითითებული ზუსტად, საიდან რა ფული მოდის, კიდევ უფრო გაწელილია პროცედურები, რომლითაც იმ არაადეკვატურ, ბუნდოვან და მათ შორის მავნებლური პრინციპებით აგებულ დახმარებას მისცემენ მოქალაქეებს. ეს მძიმე ფასი დაუჯდება ჩვენს ქვეყანას და ამ ფასს გადაიხდიან ჩვეულებრივი მოქალაქეები", — ამბობს ის.

რაც შეეხება ევროპული საქართველოს გეგმას, დეპუტატის ინფორმაციით, პარტია მის წარდგენას ხვალ, 29 აპრილს აპირებს. გიგა ბოკერია აღნიშნავს, რომ დოკუმენტში გათვალისწინებულია საგადასახადო წნეხის დაწევა ყველასთვის — მოქალაქეებისთვის, დამსაქმებლებისთვის.

"შეუძლებელი იქნება ჩვენი მოქალაქეები არ დადგნენ შიმშილის რისკის ქვეშ, თუ არ იქნება რეალური წნეხის მოხსნა. ჩვენი გეგმის მიხედვით, ჯერ საშემოსავლოს განულება ხდება, მერე განახევრება; ასევე, ქონების გადასახადის მოხსნა, დღგ-ს გადაკეთება გაყიდვის გადასახადად და აქციზის დადაბლება. იმ პირობებში, როცა ჩვენ არ გვაქვს დიდი სიმდიდრე, რომ ჩავასხათ ეკონომიკაში, რასაც მდიდარი ქვეყნები შვებიან, ეს ერთადერთი გზაა", — თქვა ბოკერიამ.

საქართველოს მთავრობამ კორონავირუსთან საბრძოლველი ანტიკრიზისული გეგმა 24 აპრილს წარადგინა. საწყის ეტაპებში გაერთიანებულია ის ნაბიჯები, რომლებიც მთავრობამ აქამდე გადადგა: სესხების გადავადება, კომუნალურები და ა.შ.; მომდევნო ეტაპები კი სამსახურის გარეშე დარჩენილი მოქალაქეების ერთჯერად ან რამდენიმეთვიანი დახმარებას და ეკონომიკის ამუშავებისთვის საჭირო ნაბიჯებს აერთიანებს. გეგმის მიხედვით, სამსახურის გარეშე და უხელფასო შვებულებაში გაშვებული მოქალაქეები 6 თვის განმავლობაში 200-ლარიან დახმარებას მიიღებენ, თვითდასაქმებულები ერთჯერადად 300 ლარს. გარდა ამისა, 6 თვის განმავლობაში საშუალოდ 600-ლარიან (თვეში 100 ლარი) დახმარებას მიიღებენ: ოჯახები, რომელთა სარეიტინგო ქულა 65 000-დან 100 000-მდეა; ოჯახები, რომელთა სოციალური სარეიტინგო ქულა 0-დან 100 000-მდეა და ჰყავთ 3 და მეტი 16-წლამდე ასაკის შვილი; მკვეთრად გამოხატული შეზღუდული შესაძლებლობების მქონე პირები და შშმ ბავშვები. გათვალისწინებულია პენსიების ზრდა, ასევე, შეღავათები კერძო სექტორისა და სოფლის მეურნეობისთვის.

ნახეთ დეტალურად:

რა უნდა იცოდეთ, თუ თვითდასაქმებული ხართ და 300-ლარიანი დახმარების მიღება გინდათ

ვის დახმარებას გეგმავს მთავრობა, როგორ აპირებს ამას და რა დაუჯდება — ანტიკრიზისული გეგმა სრულად