უკრაინელი ჟურნალისტი და ონლაინგამოცემა ცენზორ.ნეტის დამფუძნებელი, იური ბუტუსოვი წერს, რომ უკრაინის მინისტრთა კაბინეტმა პარლამენტიდან ვიცე-პრემიერის პოსტზე მიხეილ სააკაშვილის კანდიდატურა უკან გაიწვია. იური ბუტუსოვზე დაყრდნობით ინფორმაციას ავრცელებენ გამოცემები Unian და ეხო კავკაზა.

როგორც ბუტუსოვი თავის ფეისბუქპოსტში აღნიშნავს, სააკაშვილის კანდიდატურამ მმართველი პარტიის, ხალხის მსახურის მხარდაჭერა ვერ მიიღო. ამ დროისთვის, ინფორმაცია ოფიციალურად დადასტურებული არ არის.

"ხალხის მსახურის ფრაქციაში ხანგრძლივი მოლაპარაკებების შემდეგ სააკაშვილის დანიშვნისთვის 248 დეპუტატიდან დაახლოებით 140-170 ხმის შეგროვება მოხერხდა, ამასთან პარტიის ჩათში ხმის მიცემისთვის მზადყოფნა 100-ზე მეტმა დეპუტატმა გამოთქვა", — წერს ბუტუსოვი.

ჟურნალისტის მოსაზრებით, ხმების საჭირო რაოდენობა იმიტომ ვერ შეგროვდა, რომ პრეზიდენტმა ვოლოდიმირ ზელენსკიმ გადაწყვიტა, სააკაშვილის მხარდასაჭერად საჯაროდ არ გამოსულიყო.

"პრეზიდენტის ოფისი ხვდება, რომ სააკაშვილთან მოლაპარაკებები სკანდალით დასრულდება, ამიტომაც ფიქრობს, რეფორმების ნაცვლად სააკაშვილს რა შესთავაზოს. ამ ეტაპისთვის განიხილება სააკაშვილის ოდესის მერის არჩევნებზე წარდგენა, როგორც ხალხის მსახურის კანდიდატის", — ამბობს ჟურნალისტი.

მისივე მტკიცებით, პრეზიდენტმა ზელენსკიმ კიდევ ერთი ყოფილი მაღალჩინოსანი, დავით საყვარელიძე გამოძიების სახელმწიფო ბიუროს ხელმძღვანელის თანამდებობაზე წარადგინა, თუმცა საყვარელიძე ამ დრომდე არ დანიშნულა.

მიხეილ სააკაშვილის დანიშვნასთან დაკავშირებით უმაღლესი რადას პრესსპიკერმა, დმიტრი რაზუმკოვმა განაცხადა, რომ დარწმუნებული არაა, ვიცე-პრემიერის პოსტზე მის კანდიდატურას მხარს დაუჭერს.

სააკაშვილის ვიცე-პრემიერად დანიშვნის საკითხი, შესაძლოა, საქართველოსა და უკრაინას შორის დიპლომატიური ურთიერთობის გაუარესების მიზეზი გახდეს. ქართული ოცნების წარმომადგენლები პრეზიდენტ ვოლოდიმირ ზელენსკის გადაწყვეტილებას კატეგორიულად მიუღებელს უწოდებენ.

პეტრო პოროშენკოს დროს მიხეილ სააკაშვილი ოდესის გუბერნატორის პოსტს იკავებდა. თუმცა, მას შემდეგ, რაც სააკაშვილმა კორუფციაზე საუბარი დაიწყო, თანამდებობა დატოვა და ოპოზიციაში გადავიდა, პოროშენკოს განკარგულებით მოქალაქეობა ჩამოართვეს და მის წინააღმდეგ სისხლისსამართლებრივი დევნა დაიწყეს. პოროშენკოს ბრძანებით ის რეადმისიით პოლონეთში დააბრუნეს.

საპრეზიდენტო არჩევნებში გამარჯვების შემდეგ ვოლოდიმირ ზელენსკიმ სააკაშვილს მოქალაქეობა დაუბრუნა, რის შემდეგ ოდესის ყოფილი გუბერნატორი ქვეყანაში დაბრუნდა. რამდენიმე დღის წინ კი ცნობილი გახდა, რომ ზელენსკიმ რეფორმების საკითხებში მას ვიცე-პრემიერის პოსტი შესთავაზა.

ამავე თემაზე: