ქართული ოცნების დეპუტატი, რატი იონათამიშვილი ფიქრობს, რომ უკრაინელ კოლეგებს ეყოფათ გონიერება და მიხეილ სააკაშვილს ვიცე-პრემიერად არ აირჩევენ. მან რადას დეპუტატებს კიდევ ერთხელ შეახსენა, რომ სააკაშვილი არა მხოლოდ საქართველოს, არამედ სტრასბურგის სასამართლოს მიერ დამნაშავედაა ცნობილი.

"მე ვფიქრობ, რომ საბოლოო ჯამში, ცხადია ეყოფათ გონიერება ჩვენს კოლეგებს და სააკაშვილის კანდიდატურა არ იქნება მხარდაჭერილი. წინააღმდეგ შემთხვევაში ცხადია ეს აისახება ჩვენი მეგობარი ქვეყნების ურთიერთობაზე, რაც ჩემთვის ძალიან გასაფრთხილებელი და ძვირფასია", — თქვა რატი იონათამიშვილმა.

დეპუტატი ერთ-ერთი პირველი იყო, ვინც თქვა, რომ თუ მიხეილ სააკაშვილი უკრაინის ვიცე-პრემიერი გახდება უკრაინასთან დიპლომატიური ურთიერთობის გადახედვას არ გამორიცხავს.

სააკაშვილის ვიცე-პრემიერად დანიშვნის საკითხი, შესაძლოა, საქართველოსა და უკრაინას შორის დიპლომატიური ურთიერთობის შეწყვეტის მიზეზი გახდეს. ქართული ოცნების წარმომადგენლები ზელენსკის გადაწყვეტილებას კატეგორიულად მიუღებელს უწოდებენ.

შეგახსენებთ, რომ ექსპრეზიდენტის, პეტრო პოროშენკოს დროს მიხეილ სააკაშვილი ოდესის გუბერნატორის პოსტს იკავებდა. თუმცა, მას შემდეგ, რაც სააკაშვილმა კორუფციაზე საუბარი დაიწყო, თანამდებობა დატოვა და ოპოზიციაში გადავიდა, პოროშენკოს განკარგულებით მოქალაქეობა ჩამოართვეს და მის წინააღმდეგ სისხლისსამართლებრივი დევნა დაიწყეს. პოროშენკოს ბრძანებით ის რეადმისიით პოლონეთში დააბრუნეს.

საპრეზიდენტო არჩევნებში გამარჯვების შემდეგ ვოლოდიმირ ზელენსკიმ სააკაშვილს მოქალაქეობა დაუბრუნა, რის შემდეგ ოდესის ყოფილი გუბერნატორი ქვეყანაში დაბრუნდა. რამდენიმე დღის წინ კი ცნობილი გახდა, რომ ზელენსკიმ მას ვიცე-პრემიერის პოსტი შესთავაზა.

ამავე თემაზე: