საქართველოს პროკურატურამ საზოგადოებისთვის კარგად ცნობილ სამი გახმაურებული მკვლელობის საქმეებზე მსჯავრდებული პირების განაჩენების გადასინჯვის გადაწყვეტილება მიიღო. პროკურატურა დარწმუნებულია, რომ მათ სასჯელი უკანონოდ შეუფარდეს.

პროკურატურამ ახლად გამოვლენილი გარემოებები გამოარკვია ნორა არღვლიანის საქმეზე. უწყების ცნობით, გამოძიებით დადგინდა, რომ ნორა არღვლიანს სამართალდამცავებმა თავისუფლება აღუკვეთეს უკანონოდ და მას ბრალდება წარუდგინეს ყალბი მტკიცებულებების საფუძველზე.

"2006 წლის 25 ივლისს, კოდორში განვითარებული მოვლენების დროს, ბატალიონ მონადირის ხელმძღვანელის ემზარ კვიციანის და მისი თანამებრძოლების დაკავების მიზნით საქართველოს შინაგან საქმეთა სამინისტროსა და საქართველოს თავდაცვის სამინისტროს შეიარაღებული დანაყოფები შევიდნენ კოდორის ხეობაში, სადაც ნათესავებთან ერთად იმყოფებოდა ემზარ კვიციანის და ნორა არღვლიანი, რომელსაც არანაირი წინააღმდეგობა სამართალდამცავებისთვის არ გაუწევია.

მიუხედავად ამისა, ნორა არღვლიანის ადგილობრივი მოსახლეობის და კოდორისგან ჩამოცილების და გაქცეულ ემზარ კვიციანზე ზემოქმედების მოხდენის მიზნით, სამართალდამცავებმა გადაწყვიტეს ნორა არღვლიანის შეპყრობა" - აცხადებს პროკურატურა.

უწყების განცხადებით, კოდორის ხეობის დაკავებიდან მეორე დღეს, 27 ივლისს, შს სამინისტროს კონტრტერორისტული ცენტრის თანამშრომლებმა თავისუფლება უკანონოდ აღუკვეთეს ნორა არღვლიანს და ყოველგვარი დაკავების ოქმის შევსების და სამართლებრივი პროცედურების დაცვის გარეშე, მისი უფლებების უხეში დარღვევით, იგი გადაიყვანეს თბილისში მოდულის შენობაში:

"მისი დაკავებიდან 2 დღის შემდეგ, 29 ივლისს, დაიწყეს ყალბი მტკიცებულებების შექმნით პროცესების სამართლებრივ ჩარჩოებში მოქცევა".

სამართალდამცავების ოფიციალური ვერსიით, ნორა არღვლიანი დააკავეს 29 ივლისს, მისი საცხოვრებელი სახლის ჩხრეკისას ცეცხლსასროლი იარაღის და საბრძოლო მასალის ამოღების შემდეგ.

ახალ გამოძიებაზე დაყრდნობით პროკურატურა აცხადებს, რომ ნორა არღვლიანის საცხოვრებელ ბინაში არანაირი ჩხრეკა არ ჩატარებულა, ჩხრეკაში მონაწილე სამართალდამცავები კოდორის ხეობაში საერთოდ არ ყოფილან და კოდორის ხეობაში მათი შესვლისას მისი საცხოვრებელი სახლი ცენტრალური ხელისუფლების წარმომადგენლების მხრიდან სიტუაციის მართვის შტაბად გამოიყენებოდა, ნორა არღვლიანი კი უკანონოდ თავისუფლებააღკვეთილი მოდულის შენობაში ჰყავდათ გადაყვანილი.

პროკურატურა ირწმუნება, რომ ნორა არღვლიანის ბრალდების დამძიმების და მისთვის მძიმე სასჯელის დაკისრების მიზნით, მას ასევე წარუდგინეს მითვისების ცრუ ბრალდება, თითქოს 2005 წელს, მან ჰუმანიტარული საქონელი ნაცვლად სოფელ ჩხალთის მოსახლეობისთვის დარიგებისა, თავად მიითვისა და ასევე თითქოს იგი მოუწოდებდა ბატალიონ მონადირის წევრებს არ დამორჩილებოდნენ ცენტრალურ ხელისუფლებას.

ამ ბრალდებებს საქართველოს პროკურატურა ახალი გამოძიებით გამორიცხავს და აცხადებს, რომ ნორა არღვლიანის უდანაშაულობა წარდგენილ ბრალდებებში დადასტურებულია:

"ცრუ ბრალდების საფუძველზე ნორა არღვლიანმა საპატიმრო დაწესებულებაში 6 წელი გაატარა და მისი გათავისუფლება მხოლოდ ხელისუფლების ცვლილების შემდეგ 2012 წლის ნოემბერში მოხერხდა".

პროკურატურამ ასევე აცხადებს, რომ უდანაშაულოები არიან გენერალ ნინუას და მისი ცოლის და ნიკა ლომინაძის მკვლელობისთვის მსჯავრდებულები.