საქართველოს პროკურატურამ საზოგადოებისთვის კარგად ცნობილ სამი გახმაურებული მკვლელობის საქმეებზე მსჯავრდებული პირების განაჩენების გადასინჯვის გადაწყვეტილება მიიღო. პროკურატურა დარწმუნებულია, რომ მათ სასჯელი უკანონოდ შეუფარდეს.

პროკურატურამ განაჩენის გადასინჯვის გადაწყვეტილება მიიღო "ეი-ი-ეს თელასის" ფინანსური დირექტორის, ნიკოლოზ ლომინაძის მკვლელობაში მსჯავრდადებულების: გიორგი და ნოდარ გვიჩიანების, ნიკა ჩემიას, ავთანდილ ხერკელაძისა და გიორგი პაპაჩაშვილის მიმართ.

2006 წლის 15 აგვისტოს თბილისის საქალაქო სასამართლომ გამოიტანა გამამტყუნებელი განაჩენი, რომლის მიხედვით, გიორგი გვიჩიანი, ნოდარ გვიჩიანი, ნიკა ჩემია, ავთანდილ ხერკელაძე და გიორგი პაპაჩაშვილი ცნობილი იქნენ დამნაშავეებად ნიკოლოზ ლომინაძის დამამძიმებელ გარემოებებში ჩადენილი განზრახ მკვლელობის ფაქტზე.

პროკურატურის ინფორმაციით, სასამართლომ უდავო ფაქტად მიიჩნია ის, რომ ნიკოლოზ ლომინაძე მოკლეს მაყუჩიანი "მაკაროვის" სისტემის იარაღით.

"ხელახალი გამოძიების ფარგლებში ჩატარებული კომპლექსურ-კომისიური, ფიზიკო-ტექნიკური და სასამართლო-სამედიცინო ექსპერტიზის დასკვნა, გარდაცვლილის სხეულზე არსებული ჭრილობის სურათის მიხედვით, კატეგორიულად გამორიცხავს სასამართლოების მიერ დადგენილ ფაქტობრივ გარემოებას - ნიკოლოზ ლომინაძის მაყუჩიანი იარაღით მკვლელობის თაობაზე; გარდა ზემოაღნიშნულისა, სისხლის სამართლის საქმეზე მიმდინარე გამოძიების ფარგლებში დაიკითხნენ ახალი მოწმეები, რომლებიც ცალსახად უთითებენ ნიკოლოზ ლომინაძის მკვლელობის ფაქტზე მსჯავრდადებულების უდანაშაულობის შესახებ" - აცხადებს პროკურატურა.

ნიკოლოზ ლომინაძის მკვლელობის საქმეზე გამოძიებას აწარმოებდა საქართველოს შინაგან საქმეთა სამინისტრო. პროკურატურა აცხადებს, რომ ნიკოლოზ ლომინაძის მკვლელობის საქმის გახსნით დაინტერესებული იყვნენ მაღალი რანგის სახელმწიფო თანამდებობის პირები, რის გამოც სისხლის სამართლის საქმის გამოძიებისას ხელოვნურად შეიქმნა მთელი რიგი მამხილებელი მტკიცებულებები, რაც გიორგი გვიჩიანის, ნოდარ გვიჩიანის, ნიკა ჩემიას, ავთანდილ ხერკელაძისა და გიორგი პაპაჩაშვილის მიმართ გამამტყუნებელი განაჩენის გამოტანის საფუძველი გახდა.

პროკურატურა აცხადებს, რომ ხელახალი გამოძიებისას გამოვლინდა არაერთი გარემოება, რაც სასამართლოების განაჩენებით დადგენილი ფაქტობრივი გარემოებებისგან განსხვავებულ სურათზე მიუთითებს.

"ახალი გამოძიების პროცესში მოპოვებული მტკიცებულებებით დადასტურდა, რომ მსჯავრდადებულების მიმართ ბრალად შერაცხულ დანაშაულებრივ ქმედებას ადგილი არ ჰქონია, რის გამოც ყველა მსჯავრდებულის მიმართ პროკურატურის მიერ გამოტანილია დადგენილებები მსჯავრდებულის უფლების დარღვევის თაობაზე, რის საფუძველზეც ჩვენ მივმართავთ თბილისის სააპელაციო სასამართლოს ახლად გამოვლენილ გარემოებათა გამო განაჩენების გადასინჯვის მოთხოვნით" - აცხადებს პროკურატურა.

ბრალდებულებს, გია გვიჩიანსა და ნიკა ჩემიას 2006 წელს სამუდამო პატიმრობა მიუსაჯეს, თუმცა აღნიშნული სასჯელი 2015 წელს სასამართლომ 15-წლიანი პატიმრობით შეცვალა, რომლის ათვლაც 2006 წლიდან დაიწყო.

გია გვიჩიანი, რომელიც მკვლელობის დამკვეთად მიიჩნია სასამართლო, თავს უდანაშაულოდ მიიჩნევს და ამბობს, რომ 2002 წელს მომხდარი მკვლელობის გამო ის 2006 წელს იმიტომ დააკავეს, რომ სანდრო გირგვლიანის მკვლელობის საქმე გადაეფარათ.