ილიას უნივერსიტეტის სტუდენტებმა ქართველი ხელოვანების ნიმუშები გააცოცხლეს

პანდემიის პირობებში, როდესაც ადამიანებს ყოველდღიური ცხოვრების რიტმის შეცვლა და დროებით სახლებში გამოკეტვა მოუხდათ, მოწყენილობასთან ბრძოლა მნიშვნელოვან გამოწვევად იქცა. ბევრში შემოქმედებითი ნიჭის გაღვივებამაც არ დაახანა: კარანტინში გატარებულმა ერთფეროვანმა დღეებმა ყველა ასაკის ადამიანს ახალ-ახალი გასართობი საშუალებების აღმოჩენისკენ უბიძგა. და თუკი თქვენც აქამდე ყველაზე უცნაური და გიჟური, მაგრამ სახლიდან გაუსვლელად განხორციელებადი იდეებისთვის ვერაფრით იცლიდით, მაშინ გახსოვდეთ, რომ ახლა ამისთვის ყველაზე შესაფერისი მომენტია.

ილიას სახელმწიფო უნივერსიტეტის სტუდენტებიც იმ ადამიანების რიცვხში აღმოჩნდნენ, რომლებიც პანდემიით გამოწვეულ მოწყენილობას სახალისო და, ამასთან, შემეცნებითი გზით დაუპირისპირდნენ.

#GeorgianArtchallenge მსოფლიო გამოწვევის ქართული ანალოგია და იგი საკუთრივ ქართველი მხატვრების ნამუშევრების გაცოცხლებას გულისხმობს. სტუდენტების აზრით, ეს საინტერესო მიგნება დროის სახალისოდ გაყვანასა და, ამასთან, ქართველი ხელოვანების შემოქმედების მეტი ადამიანისთვის გაცნობის მიზანსაც ემსახურება.

1. ეთერ ჭკადუას "სნაიპერი" ბარბარე ჭილაშვილისგან:

"რადგან კარანტინი იყო და ოჯახშიც ყველა მოწყენილები ვიყავით, ფეისბუქზე წავაწყდი უცხოელების გაკეთებულ ჩელენჯს და ძალიან სახალისოდ მეჩვენა. მაგრამ ვიფიქრე, უფრო საინტერესო იქნებოდა, მხოლოდ ქართველ მხატვრებს თუ დავაჩელენჯებდით. როგორც აღმოჩნდა, ძალიან ბევრი ქართველი ხელოვანი არ გვცოდნია და, ერთგვარად, გარდა გასართობისა, შემეცნებითადაც იქცა ეს ყველაფერი"

2. პეტრე ოცხელის "მფრინავი მღებავი" გიორგი ხეცურიანისგან:

"ბევრი გამოწვევა ვიხილე მე პირადად კარანტინში ყოფნისას, თუმცა ყველა მებანალურა, რადგან მთელი მსოფლიოს მასშტაბით უმეტესად ერთი სახის და არაფრის მომცემი ჩელენჯები გვხვდებოდა სოციალურ ქსელებში. შემდეგ კი თავში რამდენიმე გადაკეთებული უცხოური ნახატის ფოტო ამოგვიტივტივდა და ვიფიქრეთ, ქართულ ნახატებზე წამოგვეწყო ახალი ჩელენჯი, რაც, რა თქმა უნდა, ქართული მხატვრობის უკეთ გაცნობაშიც დაგვეხმარებოდა. ხომ ხედავთ, უკვე როგორი დადებითი და პოზიტიური შედეგები მოჰყვა ამ ყველაფერს. თქვენ კი გირჩევთ, რომ შემოგვიერთდეთ!"

3. დავით კაკაბაძის ავტოპორტრეტი ანა არაბულისგან:

"დარწმუნებული ვარ, ამ გამოწვევამ ბევრს საკუთარი თავი სხვა კუთხით დაანახა, მათ შორის — მეც. არასდროს მიცდია მსგავსი რადიკალური გარდასახვა და ვფიქრობ, მცირედით მაინც შევძელი. ამიტომ გირჩევთ, მიიღოთ გამოწვევა და გპირდებით, წინ ძალიან საინტერესო და სახალისო პროცესები გელით"

4. ფიროსმანის "ქართველი ქალი დაირით" თამარ ბენდელიანისგან:

"ვფიქრობ, ამგვარი ჩელენჯები ერთობ სახალისო და შემეცნებითია, განსაკუთრებით კი ასეთ პერიოდში. მადლობა იდეის ავტორებს ამ მშვენიერი წამოწყებისთვის"

5. თედო რეხვიაშვილის პორტრეტი თამარ ჩხარტიშვილისგან:

"მსგავსი გამოწვევები თვითიზოლაციის პირობებში, ვფიქრობ, რომ საინტერესო და სასარგებლოც კია. სოციალური დისტანცირების პერიოდში ამ გამოწვევამ ჩვენი გაერთიანება, გახალისება და ქართული ხელოვნების კიდევ უფრო დაფასება გამოიწვია. რაც შეეხება შთაგონების წყაროს, მინდოდა, მოდერნულობა, დღევანდელი ტემპი არ დაგვეკარგა და ერთ-ერთი გამორჩეული თანამედროვე მხატვრის, თედო რეხვიაშვილის ნახატის გაცოცხლება ვცადე"

6. ფიროსმანის "მეთევზე" საბა მანჯგალაძისგან:

"ფიროსმანის ყველა ნამუშევარი განსაკუთრებით მიყვარს და გადავწყვიტე, რომელიმე საკუთარ თავზე მომერგო. საბოლოოდ, "მეთევზე" ავარჩიე. მთელი ღამე ვფიქრობდი, რა რესურსები დამჭირდებოდა იმისთვის, რომ ნახატს მივმსგავსებოდი. მეორე დილას გაღვიძებისთანავე მამიდას ვთხოვე დახმარება, გამოვართვი მისი წითელი ზედა და ქუდი. ვედროს მოძიება არ გამჭირვებია, მაგრამ, სამწუხაროდ, თევზის ჩანაცვლება ქათმით მომიწია. ბოლოს რამდენიმე ფოტო გადავიღე, ერთი ავარჩიე, დავამონტაჟე, ულვაშებიც მივიხატე და საბოლოო ჯამში ეს გამოვიდა. ზოგადად ძალიან მომეწონა ეს გამოწვევა, მგონია, რომ ყველა მონაწილემ ქართველი მხატვრების ბევრი უცნობი ფოტო მოვიძიეთ და ამით ჩვენი მხატვრების მიმართ ცოდნაც გავიღრმავეთ"