ყოფილი პრეზიდენტი, მიხეილ სააკაშვილი ამბობს, რომ საპრეზიდენტო ბიბლიოთეკაში წიგნების ფონდი გადარჩა, დაიწვა რამდენიმე კომპიუტერი. ამის შესახებ მან ვიდეომიმართვაში ისაუბრა:

"ბიბლიოთეკა სასწაულად გადარჩა. გადარჩა ძირითადი წიგნების ფონდი. მხოლოდ რამდემე კომპიუტერი განადგურდა და ასევე, არ დაიწვა ძირითადი სამკითხველო დარბაზები. ჯერ ერთი, ეს ბიბლიოთეკა არის არქიტექტურის ნიმუში, დაპროექტებულია ცნობილი გერმანელი არქიტექტორის, იურგენ მაიერის მიერ მაღალი ხარისხის ბეტონის არაალებადი მასალებით და მეორე, მთავარი, ეგრევე გამოიძახეს მეზობლებმა სახანძრო. ივანიშვილს დიდი ხანია თვალში ეჩხირებოდა ეს ბიბლიოთეკა, მაგრამ პირდაპირ ვერ დახურავდა. მოხდა ის, რაც მოუვიდათ კარფურის კონკურენტ ბაზრობებს".

გუშინ, 19 აპრილს, მას შემდეგ, რაც ცნობილი გახდა, რომ მიხეილ სააკაშვილის საპრეზიდენტო ბიბლიოთეკაში ხანძარი იყო, Facebook-ზე გავრცელდა ვიდეო, სადაც კაცი ამბობს, რომ შენობის "დემონტაჟს" აპირებს. კადრებში ჩანს ცეცხლმოკიდებული ბიბლიოთეკაც.

მიხელ სააკაშვილის საპრეზიდენტო ბიბლიოთეკაში დამწვარია 15 კვადრატამდე ფართი, სადაც საოფისე ინვენტარი იყო. როგორც On.ge-ს შინაგან საქმეთა სამინისტროში განუცხადეს, მომხდარზე გამოძიება საქართველოს სისხლის სამართლის კოდექსის 187-ე მუხლის მე-2 ნაწილის "ა" ქვეპუნქტით დაიწყო, რაც ცეცხლის წაკიდებით ნივთის დაზიანებას ან განადგურებას გულისხმობს. აღნიშნული მუხლი სასჯელის სახით 3-დან 5 წლამდე თავისუფლების აღკვეთას ითვალისწინებს.