ვიცე-პრემიერ მაია ცქიტიშილის მტკიცებით, რელიგიური მსახურება კორონავირუსის გავრცელების მთავარი საფრთხე არაა და ახალ შეზღუდვებს საეკლესიო რიტუალებს არ დაუკავშირებდა. მისი თქმით, აღდგომასთან დაკავშირებული რიტუალების საფრთხეა, თუმცა, ბევრ ტაძარში რეკომენდაციებს ზედმიწევნით იცავენ.

"უფრო დიდი საფრთხე შესაძლოა სხვა სახის კონტაქტები იყოს, შეკრებები, სუფრები და სასაფლაოზე გასვლა, რაც ჩვენი ტრადიციის ნაწილია. სწორედ აქ არის ძალიან დიდი რისკი იმისა, რომ მოქალაქეები არ დაიცავენ აუცილებელ დისტანციას და სხვა შეზღუდვებს", — თქვა მაია ცქიტიშვილმა.

რეგიონული განვითარებისა და ინფრასტრუქტურის მინისტრის თქმით, სასაფლაოებზე გასვლის აკრძალვა და ავტომობილებით მოძრაობის შეზღუდვა სწორედ ამ მიზნით დაწესდა.

საგანგებო მდგომარეობის ფარგლებში დაწესებული ახალი შეზღუდვებით, ქვეყნის მასშტაბით სასაფლაოები დაიკეტა. ახალი შეზღუდვებით, აკრძალულია ნებისმიერი მსუბუქი ავტომობილით გადაადგილება, მათ შორის ტაქსითაც. ასევე, სავალდებულო გახდა პირბადის ტარება.

ბოლო მონაცემებით, საქართველოში კორონავირუსის 370 დადასტურებული შემთხვევაა, მათგან გამოჯანმრთელებულია 77 ადამიანი, ხოლო გარდაცვლილია 3. კარანტინის რეჟიმში 5 079 პირი რჩება, სტაციონარში მეთვალყურეობის ქვეშ კი 558 პაციენტი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: