QuickDraw ხელოვნური ინტელექტის სასწავლო პროგრამაა, ე.წ. machine learning-ის ტექნიკა.

Machine learning ანუ დასწავლის უნარი ხელოვნური ინტელექტის ნაწილია, რომლითაც კომპიუტერს ახალი უნარების შეძენა პირდაპირი დაპროგრამების გარეშე შეუძლია. ეს ტექნიკა ისეთი პროგრამული უზრუნველყოფის შექმნას გულისხმობს, რომელსაც თვითდასწავლის და ახალი მონაცემების დამოუკიდებლად ანალიზის უნარი აქვს.

QuickDraw ექსპერიმენტია, რომლის ფარგლებშიც ბოტმა ადამიანის დახატული ნახატები უნდა ამოიცნოს. თქვენ გეძლევათ სიტყვა, რომელიც 20 წამში ან ნაკლებ დროში უნდა დახატოთ, ხოლო ხატვის პროცესში რობოტი მის ამოცნობას ეცდება.

როგორც ექსპერიმენტის აღწერაშია ნათქვამი, ამჟამად ბოტმა რამდენიმე ასეული კონცეპტი იცის, მაგრამ მასთან თამაშით თქვენ მის ცოდნას უფრო გააღრმავებთ.

მაგალითად, მან იცის ველოსიპედის დახატვის რამდენიმე ტექნიკა, მაგრამ რადგან ყველა ადამიანი ერთნაირად არ ან ვერ ხატავს, ის ყოველი ახალი ნახატის კონცეპტსა და დეტალს სწავლობს, ადარებს თავის არსებულ ცოდნას და დროთა განმავლობაში ეცდება უფრო სწრაფად და ზუსტად ამოიცნოს ის, რის დახატვასაც თქვენ ცდილობთ.

ჩართეთ ექსპერიმენტი, ითამაშეთ, გაერთეთ და თან დაეხმარეთ Google-ის პროგრამისტებს ხელოვნური ინტელექტის ამაღლებაში.