ჯანდაცვის კომიტეტის ყოფილი თავმჯდომარის აკაკი ზოიძის თქმით, ისურვებდა და ელოდა, რომ დღეს საპატრიარქო გააჟღერებდა მოწოდება — თქვენ დარჩით სახლში, ჩვენ ვილოცებთ თქვენთვის. ამ თემაზე აკაკი ზოიძემ TV პირველის ეთერში ისაუბრა.

"ამ ჟამს, ამ მომენტში ეს არის განსაკუთრებული შემთხვევა. საგანგებო მდგომარეობა გამოწვევაა ჯერჯერობით არნახული. რომ იქნებოდა იგივე "თქვენ დარჩით სახლში, ჩვენ ვიმუშავებთ თქვენთვის". ამას ეუბნებიან ექიმები, ექთნები, პოლიციელები, ვისაც უწევთ თავისი პროფესიული მოვალეობის შესრულება უდიდესი რისკის ფასად, რომ იქნებოდ ამოწოდება თქვენ დარჩით სახლში, ჩვენ ვილოცებთ თქვენთვის", — თქვა აკაკი ზოიძემ.

აკაკი ზოიძის აზრით, ასეთი მოწოდების შემთხვევაში, ეკლესიის კარი ღია დარჩებოდა და რეკომენდაციებს გაითვალისწინებდნენ არა მხოლოდ რისკჯგუფში მყოფი ადამიანები, არამედ ყველა.

დღეს, 15 აპრილს სახელმწიფომ და საპატრიარქომ გადაწყვიტეს, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება. საპატრიარქოს პრესსპიკერის, ანდრია ჯაღმაიძის თქმით, დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება. მისი განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ბოლო მონაცემებით, საქართველოში კორონავირუსით ინფიცირებულია 306 ადამიანი, მათ შორის გამოჯანმრთელებულია 71, ხოლო გარდაცვლილია 3 ადამიანი. კარანტინის რეჟიმში 4 990 პირი რჩება, სტაციონარში მეთვალყურეობის ქვეშ კი 462.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: