დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

"დღეს მთელი საქართველო რისკის ჯგუფია. დღეს ჩვენ ამის დრო აღარა გვაქვს. დღეს ჩვენ ვდგავართ იმ საშიშროების წინაშე, რომ ჩვენთან განმეორდება იტალია", — ასე უპასუხა დაავადებათა კონტროლის ცენტრის დირექტორის მოადგილემ, პაატა იმნაძემ კითხვას, რას ფიქრობს ეკლესიის გადაწყვეტილებაზე სააღდგომო ლიტურგიაზე. ამის შესახებ მან პირველი არხის ეთერში ისაუბრა.

იმნაძემ განაცხადა, რომ ყველამ უნდა გაითვალისწინოს სახლში დარჩენის მოწოდება და წყალში არ ჩაყარონ შრომა, რომელიც ვირუსის შესაკავებლად ექიმებმა და ეპიდემიოლოგებმა გაწიეს. მანვე აღნიშნა, რომ გარდაიცვალა მისი თანამშრომელი, რომელიც გულზე ოპერაციების მიუხედავად დღე და ღამე მუშაობდა, რადგან იცოდა, რომ ქვეყანას ემსახურებოდა.

"ზურას ხსოვნის გულისათვის ხალხო, ნუ გავაკეთებთ იმას, რომ რაც გავაკეთეთ, წყალში ჩაყაროთ ყველაფერი", — მიმართა მან საზოგადოებას.

დღეს, 15 აპრილს სახელმწიფომ და საპატრიარქომ გადაწყვიტეს, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება. საპატრიარქოს პრესსპიკერის, ანდრია ჯაღმაიძის თქმით, დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება. მისი განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ბოლო მონაცემებით, საქართველოში კორონავირუსით ინფიცირებულია 306 ადამიანი, მათ შორის გამოჯანმრთელებულია 71, ხოლო გარდაცვლილია 3 ადამიანი. კარანტინის რეჟიმში 4 990 პირი რჩება, სტაციონარში მეთვალყურეობის ქვეშ კი 462.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: