ჩინეთის განცხადებით, ჯანდაცვის მსოფლიო ორგანიზაციის დაფინანსების შეწყვეტით ტრამპი კორონავირუსთან გლობალურ ბრძოლას შეასუსტებს და ყველა ქვეყანას ზიანს მიაყენებს, მათ შორის აშშ-ს.

ჩინეთის საგარეო საქმეთა სამინისტროს წარმომადგენელის, ჟაო ლიჯიანის თქმით, ამ ეტაპისთვის პანდემიის სიტუაცია კრიტიკულ მომენტშია, ხოლო ტრამპის გადაწყვეტილება ჯანმოს შესაძლებლობებს შეასუსტებს.

"მოვუწოდებთ აშშ-ს, შეასრულოს თავისი პასუხისმგებლობა და ვალდებულებები, მხარი დაუჭიროს ჯანდაცვის მსოფლიო ორგანიზაციას, რათა ის გაუძღვეს პანდემიასთან საერთაშორისო ბრძოლას", — განაცხადა საგარეო საქმეთა სამინისტროს წარმომადგენელმა.

აშშ ჯანდაცვის მსოფლიო ორგანიზაციის დაფინანსებას დროებით წყვეტს. პრეზიდენტ დონალდ ტრამპის განცხადებით, აშშ ჯანდაცვის მსოფლიო ორგანიზაციას წელიწადში 400-500 მილიონი დოლარით აფინანსებს, როცა ჩინეთის ყოველწლიური შენატანი 40 მილიონია.

ტრამპის თქმით, დაფინანსება 60-90 დღის განმავლობაში შეწყდება, ამ დროის განმავლობაში ისინი კორონავირუსის მიმართ ჯანდაცვის მსოფლიო ორგანიზაციის პასუხს გააანალიზებენ და შეაფასებენ. ტრამპმა WHO-ს კრიზისის "უკიდურესად ცუდად მართვაში და საფრთხის დამალვაში" დასდო ბრალი.