ბიზნესმენ ბილ გეიტსის განცხადებით, აშშ-ს პრეზიდენტის გადაწყვეტილება ჯანდაცვის მსოფლიო ორგანიზაციისთვის დაფინანსების შეწყვეტასთან დაკავშირებით "ისეთივე საშიშია, როგორც ჟღერს".

"მათი მუშაობა COVID-19-ის გავრცელებას ანელებს და თუ ეს მუშაობა შეწყდება, ვერანაირი სხვა ორგანიზაცია მათ ვერ ჩაანაცვლებს. მსოფლიოს ახლა ჯანმო სჭირდება ჯანმო ისე, როგორც არასდროს", — წერს გეიტსი ტვიტერზე.

მას შემდეგ, რაც ჯანდაცვის მსოფლიო ორგანიზაციამ კორონავირუსის საშიშროების შესახებ პირველად იანვარში ისაუბრა, ბილ და მელინდა გეიტსების ფონდმა ვირუსთან საბრძოლველად 100 მილიონი დოლარი გამოყო. როგორც ფონდი აცხადებს, აღნიშნული თანხა ვაქცინის შექმნის, ვირუსის შეკავების, მისი გამოვლინებისა და მკურნალობისკენ იქნება მიმართული.

სამშაბათს, 14 აპრილს, დონალდ ტრამპმა განაცხადა, რომ აშშ ჯანდაცვის მსოფლიო ორგანიზაციის დაფინანსებას დროებით წყვეტს.

ტრამპის თქმით, დაფინანსება 60-90 დღის განმავლობაში შეწყდება, ამ დროის განმავლობაში ისინი კორონავირუსის მიმართ ჯანდაცვის მსოფლიო ორგანიზაციის პასუხს გააანალიზებენ და შეაფასებენ. ტრამპმა WHO-ს კრიზისის "უკიდურესად ცუდად მართვაში და საფრთხის დამალვაში" დასდო ბრალი.

აშშ-ს პრეზიდენტის გადაწყვეტილებას უკვე გამოეხმაურა გაეროც. გაეროს გენერალური მდივნის, ანტონიო გუტიერეშის თქმით, ახლა ჯანდაცვის მსოფლიო ორგანიზაციისთვის რესურსების შემცირების დრო არ არის.