ზუგდიდისა და ცაიშის ეპარქიაში ბზა არ გაიყიდება

ზუგდიდისა და ცაიშის ეპარქიაში ბზობის დღესასწაულზე ბზა არ გაიყიდება. ამის შესახებ ეპარქიის მიტროპოლიტმა, მეუფე გერასიმემ ჟურნალისტების განუცხადა.

"ძალიან ბევრ ადამიანს სახლში აქვს ბზა. ვინც მოიტანს ამ ბზას ვაკურთხებთ. ჩვენ არ გავყიდით", — განაცხადა მეუფე გერასიმემ.

მართლამადიდებელი ეკლესია ბზობის დღესასწაულს 12 აპრილს აღნიშნავს. როგორც ცნობილია, საპატრიარქო, საგანგებო მდგომარეობის მიუხედავად, აპირებს, რომ წირვა სოცილაური დისტანიციის დაცვით მრევლთან ერთად ჩაატაროს.

პირველ აპრილს პატრიარქმა ილია მეორემ გაავრცელა მიმართვა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

სამი რეკომენდაცია:

კომენდანტის საათის გათვალისწინებით, ხვალიდან ლოცვები დაიწყოს შუა დღის 16:00 საათზე, ხოლო ყოველ დღე ეკლესია დაიკეტოს საღამოს 8 საათისთვის;
აუცილებელია ტაძრის ეზოში 1,5მ-ის დაშორებით დროულად გაკეთდეს ნიშნულები;
ყოველდღიურად ხშირად უნდა გაიწმინდოს ხატები და სიწმინდეები (სპირტისა და ვარდის წყლით), ასევე, დამუშავდეს იატაკი და ეკლესიაში მუდმივი მეთვალყურეობისთვის გამოიყოს პასუხისმგებელი პირები.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

მინისტრთა კაბინეტის წევრები უარს ამბობენ ეკლესიაში მისვლაზე და მოქალაქეებსაც სახლში დარჩენისკენ მოუწოდებენ.

ბოლო მონაცემებით, საქართველოში კორონავირუსით ინფიცირების 208 შემთხვევაა დადასტურებული. ჯანდაცვის სფეროს წარმომადგენლები ვირუსის გავრცელების პიკს აპრილის ბოლოს, სწორედ საეკლესიო დღესასწაულების დროს ელოდებიან.