8 აპრილის მდგომარეობით, COVID-19 ვირუსის წინააღმდეგ ბრძოლისთვის შექმნილ #StopCoV ფონდში 124 543 899 ლარი შეგროვდა. 7 აპრილს, 18 საათისთვის, ფონდში 24 მილიონ 200 ათასი ლარი იყო მობილიზებული.

როგორც საზოგადოებრივი მაუწყებელი წერს, ვრცელდება ინფორმაცია, რომ ფონდში 100 მილიონი ლარი ქართული ოცნების თავმჯდომარემ, ბიძინა ივანიშვილმა გადარიცხა. On.ge ცდილობს გადაამოწმოს ეს ინფორმაცია.

13 მარტს ფონდმა ქართუმ გაავრცელა განცხადება, რომ კორონავირუსის გავრცელებასთან ბრძოლაში მზადაა, საჭიროებისა და დანაკლისის შემთხვევაში სახელმწიფოს ფინანსურად დაეხმაროს. ფონდის განცხადება მმართველმა პარტიამ, ქართულმა ოცნებამ გაავრცელა:

"ქართუ ფონდი, თავის მხრივ, გამოთქვამს მზადყოფნას საჭიროების, ნებისმიერი შესაძლო ფინანსური თუ სხვა სახის დანაკლისის შემთხვევაში, საკუთარი სახსრებით შეავსოს ეს დანაკლისი და სახელმწიფოს გამოუყოს იმ მოცულობის ფინანსური რესურსი, რაც საჭირო იქნება ვირუსის გავრცელების საფრთხისგან საზოგადოების მაქსიმალურად დასაცავად".

8 აპრილს საქართველოში კორონავირუსით ინფიცირების კიდევ სამი შემთხვევა დადასტურდა და საერთო რიცხვი 211-მდე გაიზარდა. ინფიცირებულთა შორის სულ გამოჯანმრთელებულია 50 ადამიანი და გარდაცვლილია 3 პაციენტი. კარანტინის რეჟიმში 4 559 პირი რჩება, ხოლო სტაციონარში მეთვალყურეობის ქვეშ 353 პაციენტია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: