უმრავლესობის ლიდერი, მამუკა მდინარაძე ამბობს, რომ ეკლესიას რეკომენდაციების ზედმიწევნით დაცვისთვის მადლობა უნდა გადაუხადონ.

მისივე თქმით, როგორც ეკლესია, ასევე საზოგადოების მთელი სპექტრი, ყველა რეკომენდაციას უნდა შეხვდეს გაგებით, რათა რისკები რაც შეიძლება მინიმუმამდე დავიდეს.

"ვხედავთ, რა მოცემულობა გვაქვს რეკომენდაციების შესრულებასთან დაკავშირებით. არის დარღვევების ინდივიდუალური შემთხვევები სუპერმარკეტებში იქნება, ეკლესიის მიმდებარედ თუ სხვაგან. თუმცა ეკლესიასთან დაკავშირებით შეგვიძლია ვთქვათ, რომ უმეტეს შემთხვევაში ზედმიწევნით სრულდება რეკომენდაციები. ნახეთ, ალბათ, ფოტოებიც და ვიდეოებიც როგორ იცავს მრევლი დისტანციას, რისთვისაც მხოლოდ და მხოლოდ მადლობა უნდა გადავუხადოთ. ვფიქრობ", — განაცხადა მდინარაძემ.

ქვეყანაში საგანგებო მდგომარეობა 21 მარტს გამოცხადდა, თუმცა საკვირაო წირვები სამების ტაძარში შეუფერხებლად გაიმართა. ტაძარში შეკრებილ მრევლს პერიოდულად აფრთხილებდნენ, დაეცვათ დისტანცია, თუმცა მათი ნაწილი ამას ვერ ახერხებდა. ზოგიერთი მათგანი პირბადის გარეშე იყო მისული. სხვადასხვა მედიაში გავრცელდა ფოტოები, სადაც ჩანს ბავშვები ეკლესიაში და ორსული ქალი. აღსანიშნავია, რომ წირვისას საერთო კოვზით ჩატარდა ზიარების რიტუალიც.

საპატრიარქოს 25 მარტის განცხადების მიხედვით, ვისაც ჯანმრთელობა ხელს არ უწყობს, განკურნებამდე სახლში უნდა დარჩეს, ხოლო ტაძრებში მისულ ადამიანებს შორის დისტანცია იქნება 2 მეტრი. ეზოში დისტანცირებისთვის საპატრიარქო 1.5 მეტრს მოიაზრებს და აღნიშნავს, რომ უკვე მიმდინარეობს დასადგომი ადგილების მონიშვნა და ტაძრების რადიოფიცირება. ამასთან, განცხადებაში ნათქვამია ისიც, რომ "ვინც უარს ამბობს ერთი ბარძიმიდან ზიარებაზე, უარს ამბობს მაცხოვარზე!". ეკლესია მიუთითებს მედიაზეც და ამბობს, რომ ხელოვნურად მზადდება აზრი, რათა შესაძლო პრობლემების მიზეზი ეკლესია გამოცხადდეს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: