"ფაქტობრივი" საყოველთაო კარანტინი და ფატალური შემთხვევები ევროპაში

28 მარტის მდგომარეობით მსოფლიოში:

დადასტურებული შემთხვევა — 775 306;
გარდაცვლილი — 37 083;
გამოჯანმრთელებული — 164 435.

საქართველოში:

დადასტურებული შემთხვევა — 103;
გამოჯანმრთელებული — 20;
კარანტინის რეჟიმში — 5 114;
სტაციონარში მეთვალყურეობის ქვეშ — 263.

დღის ფაქტი

მთავრობის გადაწყვეტილებით საქართველოში კარანტინი გამოცხადაა და შეზღუდვები გამკაცრდა. პრემიერ-მინისტრის, გიორგი გახარიას თქმით, "ფაქტობრივი" საყოველთაო კარანტინი 31 მარტს, დილის 08:00 საათიდან ამოქმედდება. შეზღუდვების მიხედვით, ნებისმიერი მოქალაქეს, გადაადგილების ნებისმიერ დროს, თან უნდა ჰქონდეს პირადობის მოწმობა. საზოგადოებრივი ტრანსპორტით გადაადგილება ქალაქებს შიგნით და მუნიციპალიტეტებს შორის სრულად იზღუდება. 31 მარტიდან ამოქმედდება კომენდანტის საათი, რომლის მიხედვით, 21:00 საათიდან დილის 06:00 საათამდე იკრძალება როგორც ქვეითად, ისე ტრანსპორტით ქალაქებში და ქვეყნის მასშტაბით გადაადგილება.

რა შეზღუდვები იქნება კარანტინის დროს — მოკლედ.

რა ხდება მსოფლიოში

იტალიაში კორონავირუსით გარდაცვლილთა რიცხვი 812-ით გაიზარდა, ჯამში — 11 591
ამავდროულად, იტალიაში ბოლო კვირის განმავლობაში ახალი შემთხვევების ყველაზე ცოტა რაოდენობა დაფიქსირდა
საფრანგეთში ბოლო 24 საათის განმავლობაში კორონავირუსით 418 ადამიანი გარდაიცვალა
ინდოეთში სასულიერო პირის მიერ იზოლაციის წესების დარღვევის გამო,40000 პირი კარანტინში მოხვდა
კორონავირუსთან საბრძოლველად ევროკომისია აღმოსავლეთ პარტნიორობის ქვეყნებს 140 მილიონ ევროს გამოუყოფს
ესპანეთში კორონავირუსით ბოლო 24 საათში 812 ადამიანი გარდაიცვალა

დღის ფოტო

ინდოეთში 21-დღიანი კარანტინის გამოცხადების შემდეგ ათასობით შრომითი მიგრანტი ნიუ-დელის სადგურზე ტრანსპორტს ელოდება, რომ საკუთარ სოფლებში დაბრუნდეს.

რა ხდება საქართველოში

"ფაქტობივი" საყოველთაო კარანტინის გამოცხადების გარდა, 30 მარტს, საქართველოში კორონავირუსით ინფიცირებულთა რაოდენობა 103-მდე გაიზარდა. ცნობილი გახდა, რომ ერთ-ერთი ინფიცირებული სამედიცნო სფეროს წარმომადგენელია. ვირუსი დაუდასტურდა ოკუპირებული აფხაზეთიდან ზუგდიდში გადმოყვანილ მოქალაქეს.

მთავრობის განკარგულებით, სახელმწიფო 16 მილიონს გამოჰყოფს შაქრის, მზესუმზირის ზეთისა და მაკარონის პროდუქტების შესაძენად. შესაბამისი განკარგულება პრემიერმა გასცა, რომ ქვეყანაში პროდუქტების მარაგები შეივსოს. იუსტიციის მინისტრის, თეა წულუკიანის თქმით, კი 2-3 დღეში ცალკე დაწესებულება ექნებათ მათთვის, ვინც საგანგებო მდგომარეობის დროს წესებს განმეორებით დაარღვევს და საპატიმროში მოხვდება.

საგანგებო მდგომარეობასთან დაკავშირებით მთავრობამ ცხელი ხაზი — 144 შექმნა, რომელიც მოქალაქეებს ინფორმაციას მიაწვდის და დაეხმარება.

სხვა მნიშვნელოვანი ამბები საქართველოში:

დღის მთავარი ჰედლაინი ქართულ მედიაში

საქართველოში კარანტინი გამოცხადდა

დღის ფრაზა:

"ამ კითხვას რამოდენიმეჯერ იმეორებთ, ჩემთვის ესეც პოპულიზმია"

საქართველოს პრემიერ-მინისტრს, გიორგი გახარიას სწრაფ ტესტებთან დაკავშირებით ჟურნალისტების კითხვები პოპულიზმად მიაჩნია. მისი აზრით, ზოგიერთი პოლიტიკოსი მედიასთან ერთად აჩენს მოლოდინს, რომ სწრაფი ტესტების შემოსვლის შემდეგ მედიკოსები გამოვლენ ქუჩაში და დაიწყებენ მასობრივ ტესტირებას, რაც სიცრუეა. მან აღნიშნა, რომ ის, რაც მედიაში სწრაფ ტესტებთან დაკავშირებით ხდება "ჩვეულებრივი პოლიტიკური მანიპულირებაა".

დღის კარგი ამბავი

საქართველოში კორონავირუსისგან 20 პაციენტი გამოჯანმრთელდა. ისინი საავადმყოფოებს უახლოეს მომავალში დატოვებენ.

ამბავი, რომელმაც გაგვაღიმა

ინდოელი პოლიციელი "კორონავირუსის ჩაფხუტით" მოქალაქეებს უხსნის, რომ სახლში დარჩნენ.

ქალაქ ჩენაის ინსპექტორი, რაჯეშ ბაბუ ქუჩაში სპეციალურად დამზადებულ "კორონავირუსის ჩაფხუტს" ატარებს. ჩაფხუტს წითელი ეკლები აქვს მიმაგრებული და COVID-19-ის მიკროსკოპულ გამოსახულებასაა მიმსგავსებული.

დღის სასარგებლო ინფორმაცია

თუ სამედიცინო სფეროს მუშაკი ხართ და თბილისში ცხოვრობთ IT სპეციალისტი გიორგი გიორგაძე სამსახურში დილის 9 საათიდან შუადღის 12 საათამდე უფასოდ წაგიყვანთ. გიორგიმ On.ge-სთან საუბრისას აღნიშნა, რომ ამ ფორმით სურს მისი პატივისცემა გამოხატოს და ექიმების ყოველდღიურობა შეამსუბუქოს. მისი თქმით, დღევანდელმა რეალობამ ყველას დაანახა, რომ ექიმები ერთ-ერთი ყველაზე მნიშვნელოვანი და საჭირო სფეროს წარმომადგენლები არიან.