თბილისის მერის კახა კალაძის თქმით, მთავრობის მიერ შესყიდულ და შემდეგ უკან გაბრუნებულ ტესტზებზე ამბობს, რომ ამ ტესტებმა ესპანეთში კატასტროფული შედეგი გამოწვია და ვერც საქართველოს აიღებდა მათზე პასუხისმგებლობას.

მისი თქმით, საქართველოში სხვა სწრაფი ტესტები შემოვა.

"რაც შეეხება კონკრეტულ ტესტებს ეს არა მხოლოდ საქართველოში, ზოგადად ევროპულ ბევრ ქვეყანაში შეიქმნა პრობლემები იმიტომ, რომ ძალიან დიდი იყო ცდომილება. ესპანეთში, მაგალითად, კატასტროფული შედეგი მიიღეს ამ ტესტებით. შესაბამისად, ჩვენც რა თქმა უნდა, ვერ ავიღებდით ამ პასუხისმგებლობას და სხვა ტესტები შემოვა საქართველოში. თუმცა, ყველაზე მთავარი არის ის, რომ pcr ტესტები, ოქროს ტესტებს როგორც ეძახიან, ჩვენ გვაქვს ამის მარაგი და ამ მიმართულებით მუშაობა მიმდინარეობს ხდება ანალიზების აღება, ტესტირება და ა.შ.", — განაცხადა კალაძემ.

საქართველომ ხელშეკრულება გააფორმა კორონავირუსის დასადგენი ტესტების მწარმოებელ ჩინურ კომპანიასთან, რომლის პროდუქციის ხარისხი ესპანეთმა დაიწუნა და უკან დააბრუნა. ესპანეთში ამბობენ, რომ ტესტის შედეგებში უზუსტობა იყო. საქართველოს ჯანდაცვის მინისტრის მტკიცებით, კომპანიამ ხარვეზის შესახებ "ნოტა გამოაქვეყნა" და პროდუქცია ყველა ქვეყნიდან თავად გაიწვია. თუმცა, ასეთი დოკუმენტი საჯაროდ არ იძებნება და არც სამინისტროში პასუხობენ On.ge-ს კითხვას, რა ფორმით მიიღეს შეტყობინება და გაავრცელებენ თუ არა მას. ამასთან, ესპანეთში ჩინეთის ელჩი ამბობს, რომ Shenzhen Bioeasy Biotechnology-ს სამედიცინო პროდუქტების გაყიდვის ლიცენზია არ აქვს.

Shenzhen Bioeasy Biotechnology-ს საქართველომ 215 000 სწრაფი ტესტი შეუკვეთა, რომლის ღირებულებაც, ხელშეკრულების მიხედვით, ტრანსპორტირების გარეშე 1 182 500 აშშ დოლარს შეადგენდა.

ჯანდაცვის მინისტრი ირწმუნება, რომ მას შემდეგ, რაც კომპანიამ ხარვეზი აღმოაჩინა, გამოაქვეყნა ნოტა და პროდუქცია ყველა ბაზრიდან თავადვე გაიწვია.

ეკატერინე ტიკარაძის თქმით, თანხა არ გადარიცხულა და ხელშეკრულებაც უკვე ანულირებულია. მინისტრის მოადგილე თამარ გაბუნია კი განმარტავს, რომ ეს ტესტები ქვეყანაში საერთოდ არ შემოსულა.